Vrasje me thikë pranë shkollës në Tiranë/ Humb jetën 14-vjeçari, plagoset një tjetër – Saga e krimeve në shkolla

Një sherr mes adoleshentëve i ndodhur mesditën e sotme pranë shkollës 9-vjeçare “Fan Noli” në Tiranë, ka përfunduar me vdekjen e një 14-vjeçari dhe plagosjen e një tjetri.

Në konflikt, sipas të dhënave paraprake, janë përfshirë tre bashkëmoshatarë pas përfundimit të orarit të mësimit.

“Rreth orës 13:10, në rrugën ‘Qema Stafa’, rreth 200-300 metra larg shkollës ‘Fan Noli’ janë konfliktuar 3 shtetas të moshës 14 vjeç.  Si pasojë e dëmtimeve të marra gjatë konfliktit, ka ndërruar jetë njëri prej tyre ndërsa tjetri ndodhet në spital, në kujdesin e mjekëve. Është shoqëruar njëri nga autorët e dyshuar, ndërsa grupi hetimor po vijon punën për sqarimin e rrethanave të konfliktit”, njoftoi policia.

Burime policore, ende të pakonfirmuara zyrtarisht, thanë për “Gijotinën” se të paktën dy nga adoleshentët e përfshirë në konflikt ishin nxënës në shkollën “Fan Noli”.

Shkollat vend krimi

Rasti i sotëm ishte më i rëndi i një serie krimesh kundër jetës që kanë ndodhur së fundmi në shkollat e vendit, apo kanë pasur protagonistë nxënës.

Disa ditë më parë, në zonën e Bregut të Lumit, konflikti mes dy 14-vjeçarëve me njeri-tjetrin në shkollën 9-vjeçare “Kolë Jakova” ka përfunduar në plagosjen e njërit prej tyre me mjet prerës.

Të njëjtën ditë, një tjetër plagosje me thikë u raportua jashtë ambienteve të një shkolle në Korçë, ku një 16-vjeçar u sulmua pasi mbaroi mësimin nga disa persona.

Gati tre javë më parë, policia raportoi se një nxënës 18-vjeçar u plagosur me thikë në oborrin e gjimnazit “Shote Galica” në Fushë-Krujë, në vazhdën e një konflikti me një bashkëmoshatar.

Ndërsa në Shtator, Policia raportoi për një plagosje me mjet prerës së një nxënësi 15-vjeçar gjatë një konflikti në oborrin e shkollës private “Mrekullia” në kryeqytet.

Që prej nisjes së vitit shkollor, Policia ka shpërndara në disa raste njoftime për rritjen e prezencës në institucionet arsimore me qëllim shtimin e sigurisë. Pavarësisht kësaj, krimet kundra jetës, si plagosjet me armë të ftohta, vijojnë të ndodhin, ndërsa rasti më i rëndë me një bilanc me një të vdekur dhe një të plagosur u shënua këtë të Hënën.

Lexo edhe:

Vrasja e 14-vjeçarit pranë shkollës, opozita kërkon dorëheqjen e Manasirliut