Dy persona lëviznin me një motor të vjedhur në Suedi, të pajisur me armë dhe skafandra, ndërsa një i tretë dyshohet se kishte marrë përsipër largimin e tyre pas krimit. Policia e Lezhës arrestoi tre të dyshuarit dhe sekuestroi tri pistoleta, municion luftarak dhe dy mjete…
Një vrasje e planifikuar në Lezhë është parandaluar nga Policia, e cila ka arrestuar tre persona gjatë operacionit të koduar “Detajet”. Të arrestuarit janë Elden Tarja, 25 vjeç, banues në Barbullush, Kristian Ymeri (Shkambi), 34 vjeç, banues në Kamzë, dhe Vinçesk Piroli, 38 vjeç, banues në Kurbin.
Sipas Policisë, dy prej të dyshuarve lëviznin të armatosur dhe me skafandra në rrugën e vjetër “Pllanë-Lezhë”, duke përdorur një motomjet që rezultoi i vjedhur në Suedi. Personi i tretë dyshohet se kishte rolin e bashkëpunëtorit, i cili do të siguronte largimin e tyre me automjet pas kryerjes së vrasjes.
Operacioni nisi pas informacioneve që morën specialistët e Sektorit për Hetimin e Krimeve të Rënda në Policinë e Lezhës për lëvizjet e dyshimta të dy personave me skafandra. Në bashkëpunim me Policinë e Shkodrës, efektivët organizuan kontrolle dhe patrullime në zonën e Lezhës dhe në drejtim të Shkodrës.
Në aksin rrugor “Gjadër-Barbullush”, policia ndaloi një automjet tip “Volkswagen”, në të cilin udhëtonin tre të dyshuarit. Sipas hetimeve paraprake, ata kishin planifikuar ta përdornin këtë automjet për t’u larguar nga vendi ku dyshohet se do të kryenin vrasjen.
Gjatë kontrolleve fizike, në motomjet, në banesën e Elden Tarjës dhe në ambientet përreth saj, policia gjeti dhe sekuestroi tri pistoleta me krehra e fishekë, municion luftarak, automjetin “Volkswagen” dhe motomjetin e vjedhur në Suedi.
Një nga tre të arrestuarit, Vinçesk Piroli, sipas Policisë, ka precedentë të shumtë penalë për krime kundër personit, si në Shqipëri, ashtu edhe jashtë vendit.
Megjithëse Policia deklaron se ka parandaluar një vrasje, në informacionin e publikuar nuk identifikon personin që dyshohet se ishte objektivi i atentatit dhe as motivin e mundshëm të krimit.
Discussion about this post