Ngjarja e rradhës që mbeti mister në zonën e Fushë-Krujës, ishte dhe vrasja e 34-vjeçarit Indrit Ndoji. I riu u gjet i pajetë pranë një kanali, me plagë të armës së zjarrit në trup.
Por ky nuk është krimi i vetëm që nuk ka zgjidhje në zonën e Fushë-Krujës, krahas atentateve, rrëmbimeve dhe shpërthimeve të shpeshta me tritol në këtë territor. Gazetari investigativ Artan Hoxha e ka cilësuar Fushë-Krujën si një prej zonave të rëndësishme të “Trekëndëshit të Bermudës” në Shqipëri, duke futur këtu edhe Lezhën dhe Laçin, zona në të cilat muajt e fundit kanë ndodhur shumë ngjarje të bujshme.
Ndoj u gjet i vdekur në kanal nga familjarët e tij që ishin nisur për në punë mëngjesin e sotëm, ndërsa nga këqyrja paraprake mësohet se ka marrë vetëm një plumb në kofshë, i cili i ka prekur arterien kryesore duke humbur më pas jetën për shkak të gjakderdhjes.
Për policinë është mister shkaku i vrasjes së Ndojt, i cili mësohet të jetë qëlluar nga një distancë e afërt, ndërkohë që nuk është gjetur ende gëzhoja.
Trekëndëshi i Bermudës
Zona në fjalë njihet për krimet e bujshme. Pak kilometra më tej gjendet Nikla, në të cilën operon një grup i madh kriminal i angazhuar në vrasje me pagesë, pengmarrje, gjobvënie si edhe kultivim të lëndëve narkotike. RENEA ka kryer një mori operacionesh në këtë fshat, por nuk ka kapur ndonjë prej “peshqve të mëdhenj” të krimit në këtë territor.
Gjatë verës, pikërisht në Fushë Krujë u ekzekutuan tre të rinj, mes tyre edhe Brilant Martinaj si pasojë e luftës me grupeve kriminale në Shqipëri. Edhe kjo ngjarje ka mbetur mister për policinë dhe qytetarët, ashtu si edhe zhdukja e Ervis Martinajt, i cili humbi gjurmët vetëm pak kilometra përballë Fushë Krujës, pikërisht në Vorë.
Zhdukja e Enver Stafukës
Një tjetër ngjarje e bujshme që ka përfshirë zonën në fjalë është edhe zhdukja e Enver Stafukës, i cili u rrëmbye në Tiranë dhe më pas nuk dihet fare se çfarë ka ndodhur me të.
Discussion about this post