Prokurori që bindi Artan Tafanin, të rrëfejë krimet e grupit të Laert Haxhiut, tregon se si u arrit të zbulohej e të dokumentohej një prej vrasjeve që ai kishte kryer.
Kreshnik Ajazi, në një intervistë ekskluzive për emisionin “Gjerat Tona”, në “Abc News”, shpjegon se si po veprohet me ballafaqimin e provave e akteve në dosje, me thëniet e të penduarit, dhe pse Tafani nuk konsiderohet ende si bashkëpunëtor i drejtësisë.
Ai thotë se në pikën ku ndodhen hetimet deri më tani Tafani konsiderohet një ndër personat nën hetim në kuadër të procedimit penal që po kryhet.
Artan Tafani, ishte i dyshuar për vrasje apo u mësua më vonë gjatë deklarimeve të tij që kishte kryer vrasje?
Ky person, në hetim ka qenë që në momentin e parë, një ndër personat e dyshuar për njërën nga ngjarjet kriminale që janë tashmë objekt I këtij hetimi. Për ngjarjen e tetorit 2021 ku mbeti I vrarë shtetasi Alban Semaku. Pra, ka qenë që në momentin e parë, në veprimet e para hetimore të kryera bashkëpunim me shërbimet e policisë gjyqësore pranë drejtorisë vendore të policisë së Elbasanit, ka qënë ndër personat e dyshuar për këtë ngjarje. Dhe që në veprimet e para hetimore, është arritur të identifikohet si person dhe të kryhen veprime të caktuara hetimore në drejtim të tij. Dua të them që, që në momentin e parë ka qenë person në kërkim për këtë ngjarje. Si i dyshuar për këtë ngjarje.
Ka qënë person i identifikuar dhe i lidhur me atë ngjarje që në momentin e parë të marrjes dijeni dhe marrjes së informacionit për atë ngjarje.
Ai ka pranuar të bashkëpunojë duke u kthyer në të penduar dhe falë dëshmisë së tij, janë zbardhur shumë krime të rënda, vrasje, shpërthime me ekploziv, atentate. Madje edhe sulme të planifikuara për njerëz të drejtësisë. Sa të besueshme janë deklarimet e Artan Tafanit?
Për t’i qëndruar korrekt detyrimeve ligjore, për sa kohë cështja vijon në fazë hetimi, unë nuk mund të konfirmoj mbi cilësinë procedural të këtij personi. Këroj mirëkuptimin tuaj, mund të konfirmoj vetëm faktin që është një ndër personat nën hetim në kuadër të këtij procedimi penal të këtyre procedimeve tashmë të bashkuara në një të vetëm sipas rregullave. Në aspektin ligjor dhe teorik, mund të them në cdo rast kur një person pranon të bashkëpunojë me drejtësinë, në kushte normale pasi merret dëshmia e tij, verifikohen të gjitha të dhënat e marra prej të penduarit, si duke i ballafaquar me aktet që janë në dosje. Pra, për të verifikuar nëse deklarimet janë apo jo reale, ashtu edhe me vijim e veprimeve të tjera verifikuese me qëllim që të verifikohet besueshmëria e personit, saktësia, sinqeriteti i bashkëpunimit me organet e drejtësisë të një personi i cili merr një status të tillë.
Gjithësesi me këtë nuk dua të them që personi nën hetim është bashkëpunëtor i drejtësisë, nuk mund ta konfirmoj dicka të tillë për shkak të detyrimeve ligjore, por teorikisht kjo është situata si një institut procedural. Në kushtet e luftës ndaj krimit të organizuar në disa raste kthehet si prova kryesore, për të sqaruar të gjithë mënyrën e veprimit të një forme të krimit, për të sqaruar bashkëpunëtor, rrethanat e ngjarjes, veprat penale. Pra, kthehet në provë decizive për të hetuar një formë të krimit të organizuar, prandaj është një instrument shumë i rëndësishëm i krijuar.
Discussion about this post