Ilir Gjokaj, 28-vjeçari që ishte shpallur në kërkim për vrasjen e partneres së tij, 19-vjeçares shqiptare, Shejla Bakija është vetëdorëzuar në polici.
Mediet fqinje bëjnë me dije se Gjokaj është vetëdorëzuar në polici gjatë orëve të vona të mbrëmjes, ndërsa nuk bëhen të ditura detaje lidhur me dëshminë e tij.
Shejla Bakija u vra të mërkurën nga partneri i saj, Ilir Gjokaj. Autori shkoi në banesën e familjes së Bakijas, duke qëlluar me breshëri arme këdo që i doli përpara. Plumbat i morën jetën 19-vjeçares dhe gjyshes së saj, ndërsa mbeti i plagosur rëndë babai i të resë.
Shejla Bakijas kishte dëshmuar më parë kërcënimet për vrasje që merrte vazhdimisht nga partneri i saj, Në një dëshmi të dhënë në polici gjashtë muaj më parë, Bakija kishte deklaruar se ai e kërcënonte se do ta vriste nëse ajo martohej me dikë tjetër. Por, pavarësisht kësaj autoritet nuk morën asnjë masë dhe ndodhi tragjedia e paralajmëruar, ku 19-vjeçarja mbeti e vrarë.
Shoqatat për mbrojtjen e të drejtave të grave si dhe qytetarë të thjeshtë kanë protestuar ditën e djeshme në rrugë dhe kanë kërkuar hetimin e plotë për rastin dhe arrestimin e autorit. Ata fajësuan policinë kur thanë se ka heshtur gjatë kohës kur e reja ka bërë denoncime për dhunë, duke çuar kështu në vrasjen e saj.
