Të tjera detaje janë zbuluar lidhur me vrasjen e 39-vjeçarit shqiptar Brigen Limka, i cili u qëllua me armë zjarri nga një 68-vjeçar grek pas një debati për parkimin.
Televizioni Mega në Greqi ka arritur të sigurojë informacione nga dëshmia e Dhimitris Kutrumanis, i arrestua nga policia pak çaste pasi kreu krimin.
“Nuk doja që të përfundonte kështu”, raportohet të ketë deklaruar vrasësi, duke shprehur siç duket një lloj pendimi.
Krimi i rëndë ndodhi në Pire, ndërsa viktima me origjinë nga Korça, njihej si një njeri i qetë, pa probleme në zonën ku jetonte prej vitesh.
Sipas informacioneve të MEGA-s, autori kur ka mbërritur në nëndrejtorinë e Sigurisë së Pireut u ka thënë punonjësve të policisë se kishte kohë që ka patur përplasje me viktimën për parkimin.
“Makinat i vendosin nga parkingu edhe në trotuar. Ata po bllokonin rrugët. E kisha shprehur indinjatën time shumë herë. Nuk doja që të përfundonte kështu”, raportojnë mediat greke të ketë deklaruar 68-vjeçari.
Viktima nuk e ka parë autorin, i cili ishte fshehur pas një makine dhe i ka dalë përpara shqiptarit, me një armë që e kishte pa leje, duke e qëlluar në kokë dhe fytyrë.
Krimi ka ndodhur për 9 sekonda, ndërsa autori është larguar drejt apartamentit ku edhe u arrestua nga policia.
Sipas informacioneve, mes tyre kishte pasur një debat, i cili sipas dëshmitarëve okularë ishte një fenomen thuajse i përditshëm, ku 68-vjeçari debatonte jo vetëm me viktimën, por edhe me fqinjët e tjerë.
Viktima është dërguar fillimisht në spitalin e Zaneios, por fatkeqësisht nuk i ka shpëtuar dot plagëve të marra.
Kamerat e sigurisë në rrugë kanë filmuar momentin e rëndë, ku duket autori që e qëllon viktimën me armë gjahu dhe më pas largohet.
“Mbarova me ty tani, mbarova me ty”, thuhet se ka bërtitur autori sapo ka qëlluar shqiptarin, sipas qytetarëve të cilët panë ngjarjen e rëndë.
Discussion about this post