Është vetëdorëzuar sot në polici i riu 23-vjeçar shqiptar, i cili pak dy javë më parë plagosi me armë zjarri bashkëkombësin e tij Rexhep Uba, 48-vjeç. Mësohet se, 23-vjeçari ka shkuar te avokati i tij në qendër të qytetit i cili tha se do ishte më mirë të dorëzohej dhe më pas janë paraqitur të dy në rajonin e policisë.
Ngjarja ndodhi mëngjesin e 5 tetorit, në kryqëzimin mes rrugëve Saorgio dhe Venezia në Torino, ku mbeti i plagosur Rexhep Uba, i cili gjithashtu ishte figurë e njohur për autoritetet në Itali. Vite më parë ai ka qenë nën hetim së bashku me disa persona të tjerë si të përfshirë në trafikun e drogës nga Shqipëria drejt Torinos. Ai dhe bashkëpunëtorët e tij u arrestuan gjatë një aksioni anti-drogë në atë kohë dhe u sekuestruan tonelata lëndë narkotike që po transportoheshin me kamion.
48-vjeçari u qëllua me armë, raportohet se vëllai i Rexhep Ubës ndoqi në këmbë me vrap autorin e dyshuar. Ai ka qenë brenda makinës tip Fiat Panda të parkuar në anë të rrugës duke pritur vëllain. Kur pa se 48-vjeçari u qëllua me armë, vëllai i Rexhep Ubës doli nga mjeti dhe ndoqi me vrap autorin, por nuk mundi ta kapte. Policia italiane vijon hetimet për këtë ngjarje.
Ndërkohë, i vëllai foli për një “sherr të rastësishëm në rrugë” para të shtënave. Megjithatë, siç raportojnë mediat lokale, ka pak gjasa që deklarata e të vëllait të 48-vjeçarit të jenë të besueshme për hetuesit, nisur dhe nga e kaluara e Rexhep Ubës. Ky i fundit ka precedentë në fushën e narkotikëve.
Nga ana tjetër i plagosuri vijon të jetë i shtruar në spitalin Molinette, në gjendje mjaft kritike për jetën.
