Gjykata e Tiranës ka kaluar për gjykim dosjen në ngarkim të Mario Përlleshaj, autorit të dyshuar të vrasjes së Martin Canit pranë shkollës “Fan Noli” më 18 nëntor të vitit të kaluar. Përlleshaj akuzohet për veprën penale vrasje në rrethana të tjera cilësuese.
Mbrojtja e Përlleshajt kërkoi gjykim të shkurtuar por gjyqtarja Migena Laska e rrëzoi kërkesën.
Si pasojë e përleshjes mes të miturve mbeti i plagosur edhe vetë autori i dyshuar si dhe Luis Meçaj. Ky i fundit, mori pjesë në seancën e sotme bashkë me familjarët e Martin Canit si viktima të veprës penale.
Pas përfundimit të seancës ndaj Përlleshajt, 14-vjeçari Luis Meçe i cili mbeti i plagosur me thikë në tragjedinë e 18 nëntorit të vitit të kaluar, në afërsi të shkollës “Fan Noli”, ka dhënë një prononcim të shkurtër për mediat.
14-vjeçari u shpreh se përjetimi i seancës gjyqësore ishte i vështirë, teksa theksoi se është i gatshëm të dëshmojë në gjyq nëse do t’i kërkohet.
“Nuk e kam përjetuar mirë seancën, por dua të them se kërkojmë drejtësi. Jam gjithnjë i gatshëm të dëshmoj në gjyq nëse më kërkohet”, tha Meçe.
Vetëm disa ditë para krimit, adoleshentët ishin konfrontuar me njëri-tjetrin, dhe shkolla pretendoi se i kishte ballafaquar të miturit dhe pas kësaj ishin pajtuar, por në fakt, konflikti vijoi disa ditë më pas sapo fëmijët lanë ambientin e shkollës, ku u regjistruar disa metra larg saj edhe ngjarja e rëndë.
Discussion about this post