Maliq Marku, 70 vjeç, u arrestua nga Policia pasditen e sotme, pasi vrau me armë zjarri fqinjin e tij Shefqet Hasa dhe plagosi një tjetër fqinj.
Krimi ndodhi pas një debati për një kanal uji. Policia tha se kishte arrestuar autorin e dyshuar të ngjarjes në banesën e tij, ndërsa kishte sekuestruar edhe armën e zjarrit, të cilën 70-vjeçari e kishte pa leje.
Policia e klasifikoi krimin për arsye banale, ndërsa shefi i komisariatit të Kamzës pohoi se ngjarja ka ndodhur pas një debati të momentit mes 70-vjeçarit dhe fqinjëve të tij, njëri prej të cilëve mbeti viktimë, ndërsa tjetri ndodhet në spital, me dy plumba, njërin në këmbë dhe tjetri në bark.
Por si ndodhi ngjarja?
Sipas raportimeve Maliq Marku kishte vetëm 1 javë që ishte kthyer nga Britania e Madhe. Prej dy vitesh në banesën e tyre nuk jetonte askush, pasi ishin larguar drejt Britanisë.
Marku u përfshi në debat me fqinjët për shkak të një kanali që ishte hapur privatisht nga banorët me shpenzimet e tyre. Marku nuk kishte paguar në këtë investim, pasi nuk ndodhej në Shqipëri. Marku ka tentuar të bëjë një lidhje të banesës së tij me kanalin e ujrave të zeza, që ishte hapur privatisht nga banorë të zonës.
Sipas raportimeve, kjo tentativë e Markut është kundërshtuar nga banorët me pretendimin se ai nuk kishte paguar kur ishin bërë punimet.
Por Maliq Marku ka kontaktuar me ujësjellës kanalizimet e Kamzës të cilët kanë ardhur dhe kanë bërë piketimet pikërisht në kanalin që ishte hapur nga banorët privatisht.
Autori është konfliktuar me Shefqet Hasën, ku ka marrë edhe një pistoletë dhe e ka qëlluar 4 herë duke i shkaktuar vdekjen. Ndërkohë Besim Keçën e ka qëlluar me 2 plumba.
Discussion about this post