Shtetasi Bajram Velija, i akuzuar për vrasjen e gruas së tij me 14 plumba në Prizren, Armenda Aliu Velija, është dënuar me burgim të përjetshëm.
Lajmin e ka bërë të ditur avokati i palës së dëmtuar, Arianit Koci, përmes një postimi në Facebook.
“Vrasësi i gruas së vet, Armenda Aliu Velija, u dënua me burgim të përjetshëm. Gjykata, ashtu si e kam propozuar në cilësinë e përfaqësuesit të palës së dëmtuar, e ka dërguar porosinë në shoqërinë tanë: tash e tutje, vrasjet e grave do të dënohen maksimalisht. Përndryshe, ky vendim i guximshëm po e kthen besimin në sistemin e drejtësisë”, ka shkruar Koci.
Sipas aktakuzës së Prokurorisë Themelore në Prizren, të përpiluar më 28 shkurt 2020, Bajram Velija akuzohet se më 6 gusht 2019, në lagjen “Jeta e Re” në Prizren, ka ekzekutuar me dashje bashkëshorten e tij.
Sipas raportit shkak ka qenë një konflikt i çastit ndërmjet çiftit, ku pasi bashkëshortja tentoi të dilte nga shtëpia, Velija ka marrë armën dhe ka qëlluar drejt saj me 14 plumba duke e lënë të vdekur në vend.
