Është arrestuar nga policia Elton Metaj, autori i cili mbrëmjen e djeshme vrau me automatik ish-gruan e tij në Fier. Mësohet se, 31-vjeçari është kapur nga FNSH në një zonë të pyllëzuar në fshatin Peshtan, bashkë me armën e krimit automatik dhe motomjetin me të cilin u largua nga vendngjarja.
I arrestuari gjatë mbrëmjes së djeshme qëlloi për vdekje ish-bashkëshorten, Sabrina Bengaj në banesën e prindërve të saj. Ky krim ishte i paralajmëruar, pasi rreth një vit më parë, Meta kishte kërcënuar familjen e ish gruas dhe më pas kërcënoi se do kryente vetëvrasje.
Megjithatë ai u la i lirë pas disa muajsh burg dhe më pas kreu edhe krimin tronditës duke i marrë jetën ish-bashkëshortes së tij. 31-vjeçari ka qëlluar me armë zjarri Bengajn në banesën e prindërve të saj, ndërsa Armando Bengaj, vëllai i viktimës ka treguar për gazetarët si ka ndodhur ngjarja.
Ai është shprehur se e motra, kishte qenë duke ngrënë bukë pasi sapo ishte kthyer nga puna, kur në derë të shtëpisë së prindërve në Zhupan të Fierit, kishte shkuar ish-bashkëshorti dhe më pas e kishte qëlluar Sabrinën për vdekje.
31-vjeçari do të akuzohet për veprat penale “Vrasja për shkak të marrëdhënieve familjare” “Armëmbajtja pa leje” , “Kundërshtim i punonjësit të policisë” dhe “Dhunë në familje”.
