Vrau për hakmarrje, vetëdorëzohet në polici Habib Rexha

Vetëdorëzohet në polici Habib Rexha, 31 vjeçari i cili dyshohet si autor i vrasjes së Arian Gosës.

Policia njoftoi krahas kërkimeve intensive të zhvilluara për kapjen e shtetasit Habib Rexha, strukturat e Policisë negociuan dhe me familjarët me qëllim dorëzimin e këtij shtetasi.

Si rezultat i veprimeve kërkimore, pamundësisë së largimit dhe negociatave me familjarët, shtetasi Habib Rexha u vetëdorëzua në Komisariatin e Policisë Kavajë,” njoftoi policia.

Arian Gosa ishte me të atin dhe po pinte kafe në një lokal të Kavajës kur Habib Rexha u afrua dhe e vrau me një plumb në kokë.

Ngjarja ndodhi dy ditë më parë në një lokal në qytetin e Kavajës, ku Rexha qëlloi me armë zjarri ndaj Arian Gosës, i cili ishte bashkë me babain e tij.

Policia pak minuta pas ngjarjes tha se krimi kishte ndodhur për hakmarrje, ndërsa vendosi edhe një shpërblim prej 10 mijë euro për kapjen e autorit.

Vrasja e dy ditëve më parë ka lidhje me një tjetër ngjarje të rëndë të regjistruar po në Kavajë në fund të muajit mars, ku Edmond Gosa dhe Sali Rexha, i njohur ndryshe si Altin Rexha, u përfshinë në një konflikt, ku mbetën të dy viktima.

Sipas raportimeve Edmond Gosa qëlloi me thikë Rexhën, ndërsa ky i fundit reagoi duke e qëlluar me armë zjarri.

Si pasojë e plagëve të marra të dy shtetasit e përfshirë në konflikt, kanë ndërruar jetë në spital.