Prokuroria Themelore në Gjakovë, ka ngritur aktakuzë kundër të pandehurit G.K., i cili vrau të vëllanë për para dhe më pas dogji kufomën për të fshehur krimin. Mbi të pandehurin rëndojnë veprat penale për “Vrasje e rëndë” dhe “Armëmbajtje pa leje”.
Më 11 shkurt 2020, në fshatin Bërnjak, shtetasi G.K, me qëllim përfitimin e pasurisë, ka vrarë të vëllanë në shtëpinë e këtij të fundit.I pandehuri kishte informacion se vëllai kishte një shumë të konsiderueshme të parash, të cilat i kishte marrë me vete nga shteti i Zvicrës.
Rreth orës 09:00 i pandehuri kishte shkuar në shtëpinë e tij, ku gjatë një bisede të përbashkët ishte fyer nga i vëllai me pretendimin se po i ndërhynte në familjen e tij. I revoltuar nga situatë ai kthehet në shtëpinë e tij, merr armën dhe rreth orës 11:00 hynë në shtëpinë e të vëllait, të cilin e goditi me plumb në gjoks duke i shkaktuar vdekjen.
Pas vrasjes, i pandehuri mësohet se e ka tërhequr zvarrë kufomën me një batanije dhe e ka nxjerrë në oborrin e shtëpisë ku e ka mbuluar me materiale të ndryshme si, dru, plastika, thasë letre, dërrasa, letër të zezë, të cilat më pas i ndez duke krijuar një zjarr të madh i cili qëndroi i ndezur për 2-3 ditë. Më pas mbetjet e zjarrit mbetjet kockore të të ndjerit i ka hedhur jashtë shtëpisë në një vend deri tani të pa identifikuar më qëllim për t’i zhdukur gjurmët e krimit.
“Me këto veprime i pandehuri ka kryer veprën penale “Vrasje e rëndë”. Po ashtu, i dyshuari më parë e deri më 11 shkurt 2021, pa autorizim ka poseduar armë dhe municion, në kundërshtim me ligjin e zbatueshëm lidhur me armët, në Republikën e Kosovës. Me këto veprime i pandehuri ka kryer veprën penale “Mbajtja në pronësi, kontrolle ose posedim të paautorizuar të armëve”. Prokurori i rastit i ka propozuar Gjykatës kompetente, që i pandehuri G.K., të shpallet fajtor dhe të dënohet sipas ligjit për veprat penale të cilat i vihen në barrë”, thuhet në njoftim.
Discussion about this post