Prokuroria e Fierit mbyll hetimet dhe dërgon për gjykim 77-vjeçarin Nazif Musai i akuzuar për veprën penale “vrasje për shkak të marrëdhënieve familjare”.
Më 6 mars të këtij viti, Musai vrau vëllain e tij Aziz Musai në fshatin Çukas i Vjetër të Lushnjes. Ngjarja ndodhi pas konflikteve të vazhdueshme mes tyre për një rrugë ku kalonin.
Prokuroria e Fierit njofton se përfundoi hetimet dhe dërgoi në gjyq shtetasin N.M., i akuzuar për kryerjen e veprave penale “Vrasje për shkak të marrëdhënieve familjare” dhe “Mbajtja pa leje dhe prodhimi i armëve, armëve shpërthyese dhe i municionit”, parashikuar nga nenet 79/c dhe 278/1 të Kodit Penal.
“Nga hetimet e zhvilluara në kuadër të procedimit penal nr.379, të vitit 2024, rezultoi e provuar se në datë 06.03.2024, rreth orës 08:00, në fshatin Çukas i Ri, Njësia Administrative Allkaj, Bashkia Lushnjë, ka pasur një konflikt fizik mes shtetasve N.M dhe A.M, vëllezër me njëri-tjetrin, lidhur me çështje pronësie. Gjatë këtij konflikti, i pandehuri N.M, ka qëlluar me armë zjarri në drejtim të vëllait të tij, viktimës A.M, duke i shkaktuar atij humbjen e jetës”, thuhet më tej në njoftimin e akuzës.
Discussion about this post