Një letër e shkruar nga Bin Laden, ish-udhëheqësi i Al Kaedës, është nxjerrë nga “arkivat” dhe po i jepet një rëndësi e madhe duke parë situatën aktuale në Afganistan.
Letra u gjet mes shumë dokumenteve të tjera në kompleksin ku ai u ekzekutua dhe u bë publik për herë të parë në vitin 2012.
Në këtë shkresë, Bin Laden kishte lënë direktivat e qarta për vrasjen e Presidentit të atëhershëm të SHBA-ve, Barack Obama. Në dokumentin prej 48 faqesh të shkruara me anë të një ndihmësi të identifikuar si “Vëllai Shejh Mahmud’, emri i vërtetë i të cilit është Atiyah Abd al-Rahman, Bin Laden tregoi organizimin e dy skuadrave kundër Barack Obamë-s dhe ish-drejtorit të CIA-s, David Petraeus.
Sigurisht që ky sulm ishte përgatitur të realizohej nëse Obama dhe Petraeus vizitonin Pakistanin apo Afganistanin. Faqja me numër 36 tregon se dy skuadra të mirëorganizuara do t’i prisnin për t’i sulmuar.
“Obama është kreu i pabesisë dhe vrasja e tij automatikisht do të bëjë që Biden të marrë presidencën për pjesën e mbetur të mandatit, pasi është ligj atje. Biden është plotësisht i papërgatitur për atë post dhe do t’i çojë SHBA-të në krizë” – shkruante Osama Bin Laden për ish-Presidentin.
“David është njeriu i duhur në këtë vit të fundit të luftës dhe vrasja e tij do të ndryshonte rrjedhën e ngjarjeve,”- shtonte ai për Petraus.
