Një ngjarje e rëndë ka ndodhur pas mesnate në fshatin Salari të Tepelenës, ku biznesmeni italian, Edoardo Sarchi, 44 vjeç, është gjetur i vrarë me armë zjarri. Krimi ndodhi në vendin e quajtur Dilan, në aksin rrugor mes Nivicës dhe Salarisë.
Sipas dëshmisë së shoferit të viktimës, i cili udhëtonte së bashku me persona të tjerë në automjet, një person u ka dalë papritur përpara makinës duke ngritur dorën për t’i ndalur. Në atë moment, autori ka hapur zjarr me automatik, duke qëlluar fillimisht në drejtim të gomave dhe më pas duke vrarë shtetasin italian.
Burime nga policia bëjnë me dije se autori i dyshuar i vrasjes është identifikuar si Gazmend Braçe. Pas identifikimit, policia ka ngritur postblloqe në zonë dhe po punon për kapjen e tij.
Biznesmeni italian rezulton të jetë pronar i një fabrike tullash në kryeqytet. Një grup hetimor është ngritur për të zbardhur plotësisht rrethanat e ngjarjes dhe për të kuptuar motivin e krimit.
“Rreth orës 00:30, në fshatin Salari, në vendin e quajtur “Dilan”, në rrugë është gjetur pa shenja jete shtetasi italian E. S., 44 vjeç, banues në Tiranë, i cili dyshohet se është vrarë me armë zjarri. Shërbimet e Policisë, me marrjen e njoftimit, shkuan menjëherë në vendin e ngjarjes. Është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorit/ëve”, tha policia në njoftimin paraprak për ngjarjen.
Discussion about this post