Një ish-ushtar i UÇK-së raportohet se është vrarë në Francë. Ngjarja ka ndodhur në Dijon, ndërsa viktima ishte në gjumë kur është sulmuar nga bandit kriminale.
Ngjarja po hetohet nga autoritetet, ndërsa të afërmit e viktimës, 55 vjeçarit Veli Sadiku nga fshati Rashan, shprehen për “Jepi Zë” se i ndjeri është vrarë nga bandat kriminale në Dijon të Francës.
Ai është qëlluar mbrëmjen e së shtunës teksa ishte në gjumë.
Familjarët kanë treguar, se Veli Sadiku ka qenë ushtar i Ramush Haradinajt në Koshare dhe Pashtrik.
Postimi i plotë:
Të Allahut jemi dhe vetëm tek Ai është kthimi ynë!
Me dhimbje të thellë njoftojmë familjarët, miqtë dhe farefisin tonë se në moshën 55-vjeçare, ka ndërruar jetë Agji ynë, Veli ( Sadik ) Sadiku , duke na lënë të pikëlluar dhe me zemër të thyer.
Dhimbjen nuk mund ta shprehin dot fjalët, por kujtimi për ty Agji do të jetë i përjetshëm.
Lusim Allahun Fuqiplotë ta mbulojë me mëshirën e tij dhe ta gradojë në Xhennetul-Firdeus!
Ndërkohë, “Le Figaro” shkruan se Sadiku ishte viktimë e rastësishme.
Vajza e viktimës shprehet se ajo dhe nëna e saj u zgjuan nga të shtënat e armëve, të cilat u ndalën fillimisht për disa momente dhe pastaj filluan sërish.
“Kur unë dhe nëna ime shkuam të shohim babanë ku flinte në shtratin e tij, ai kishte vdekur”, thotë 23-vjeçarja për gazetën franceze.
Viktima, bashkë me familjen e tij kishte 14 vjet që jetonte në Francë.
“Rreth orës 12:30, disa personat që udhëtonin me një automjet kanë qëlluar me armë zjarri në drejtim të ndërtesave dhe nga një prej të shtënave ka mbetur i qëlluar për vdekje një 55-vjeçar, i cili ndodhej në banesën e tij ”, thotë prokurori i Dijonit.
Viktima e shpallur i vdekur në orën 00:50 ndodhej në banesën e tij në katin e parë me gruan dhe vajzën e tij, thotë një burim policor.
Discussion about this post