Për situatën e tensionuar në veri të Kosovës, ka reaguar edhe kryetari i Partisë Demokratike. Me anë të një postimi në facebook, Basha shkruan se po e ndjek me shqetësim situatën e krijuar në Kosovë edhe pse vendimi i Kosovës është i drejtë dhe legjitim për reciprocitetin. Më tej ai shkruan se destabilizimi i Kosovës është për interesat politike të Aleksandër Vuçiç.
“Po ndjek me shqetësim situatën e krijuar në veri të Kosovës, pas vendimit të drejtë dhe legjitim të qeverisë për vendosjen e reciprocitetit. Aktet kriminale të ndodhura në 24 orët e fundit të frymëzuara nga Beogradi zyrtar, synojnë destabilizimin e Kosovës dhe krejt rajonit për interesat politike të Aleksandër Vuçiç.
Basha ka shprehur mbështetje të plotë për qeverinë e Kosovës dhe institucionet e saj. Ai gjithashtu thotë se detyra e Shqipërisë është që të përdor të gjitha mekanizmat për zgjidhjen e kësaj situate.
“Shpreh mbështetjen e plotë dhe të fuqishme për qeverinë e Kosovës, institucionet e saj dhe të gjithë faktorin politik të angazhuar në përballimin e kësaj situate. Detyra e Shqipërisë, edhe si vend anëtar i NATO-s, nuk është të heshtë por të përdorë të gjithë mekanizmat e saj diplomatikë për të ndihmuar në zgjidhjen e kësaj situate. Nuk mund të tolerohen tanket dhe avionët ushtarakë që mësyjnë kufijtë e Kosovës, duke kërcënuar paqen dhe sigurinë e të gjithë rajonit” – shkruan Basha në facebook.
Situata në veri të Kosovës është tensionuar, aq sa dy vendet kanë mobilizuar ushtritë e njëra-tjetrës.
