Ndërsa kryeministri Rama, “po punon” me mikun e tij Alexandër Vuçiç për njohjen de facto të Kosovës, ky i fundit ka dalë dhe ka kërkuar të veprohet kundër lobimeve që po bën Prishtina zyrtare për njohjen e shtetit nga organizatat ndërkombëtare.
Ky reagim i Vucic vjen pas përfundimit të memoriumit të Uashingtonit mes Kosovës dhe Serbisë, nënshkruar më 4 shtator në Shtëpinë e Bardhë.
Mediat serbe shkruajnë se Vuçiç gjatë një interviste ditën e djeshme paralajmëroi autoritetet në Prishtinë që të mos lobojnë për pavarësinë e vendit, pasi ata do të fillojnë gjithashtu të lobojnë kundër njohjes.
Presidenti shtoi se Prishtina ka një pozitë të favorshme në Këshillin e Evropës dhe se ajo do të bëhet anëtare e këtij Këshilli, pasi ka marrë mbështetje të madhe nga vendet evropiane.
“Në INTERPOL dhe UNESCO ne do t’i mundim ata. Në Këshillin e Evropës, është e vështirë për ne. Por, kandidimi i tyre i parë zyrtar do të na e hapë derën dhe më pas ne do t’u tregojmë atyre se nuk mund të rrimë duarkryq, e mund të veprojmë me përgjegjësi dhe reciprocitet. Për tu treguar atyre se si mbrohet rendi i OKB -së, rendi ligjor në botë dhe si ne dimë të luftojmë për njerëzit tanë dhe vendin tonë,” tha presidenti.
Ai gjithashtu theksoi se ishte i shqetësuar për situatën në Kosovë dhe Bosnje & Herzegovinë. Në mesazhin e tij Vuçiç edhe pse “dëshiron të ruajë paqen”, foli edhe një herë për arkivolet.
“Unë nuk dua të kthej fëmijët tek asnjë nënë në arkivol. Ne do të ruajmë paqen, ne do të kemi sukses në këtë dhe Serbia do të ecë përpara”, tha ai.
