Presidenti i Serbisë, Aleksandar Vuçiç, komentoi në Bled të Sllovenisë nga ku po mbahet Forumi Strategjik, nismën “Open Balkan” në të cilën bën pjesë bashkë me kryeministrin Edi Rama dhe atë të Maqedonisë së Veriut, Zoran Zaev.
Në fjalën e tij në Forumin për Europën, Vuçiç tha se përmes iniciativave të tilla bëhej e mundur tejkalimi i vështirësive ekonomike në Ballkanin Perëndimor. Sipas tij, disa njerëz nuk e dëshirojnë suksesin e kësaj nisme vetëm sepse nuk e kanë “timonin” në duart e tyre.
“Filluam të gjejmë vetë mënyra për të kapërcyer vështirësitë ekonomike. Krijuam mekanizmin tonë për të kapërcyer të gjitha vështirësitë, përfshirë edhe “Ballkanin e Hapur”. Dëshirojmë të kemi qarkullim të lirë pa kufij në të ardhmen. Janë disa njerëz që nuk e dëshirojnë këtë, vetëm sepse nuk e kanë timonin në duart e tyre, por të themi të vërtetën, ne nuk mërzitemi për ata më,”- ka thënë Vuçiç.
Ai gjithashtu tha se është i shqetësuar se Kosova do ta fillojë fushatën për njohje më 4 shtator, ditën kur skadon moratoriumi njëvjeçar i nënshkruar në Shtëpinë e Bardhë në Washington gjatë administratës së Donald Trumpit.
“Jam i shqetësuar për informacionin se ata do të fillojnë një fushatë të re më 4 shtator për t’u njohur në organizatat ndërkombëtare. Është puna jonë të përgatitemi për këtë”, tha Vuçiç para gazetarëve.
