Një ditë pas vendimit të Gjykatës së Apelit për të dërguar për rigjykim në Shkallën e Parë çështjen e vulës së Pd, përfaqësuesi ligjor i grupimit “Alibeaj” në këtë proces, Indrit Sefa ka bërë thirrje për bashkimin e kësaj force politike.
Teksa Alibeaj u shpreh dje se nga ky vendim nuk triumfoi akush dhe indirekt sinjalizoi Sali Berishën për të diskutuar mbi bashkimin e PD, edhe Sefa ka mbajtur sot një qëndrim të ngjashëm teksa në një prononcim në media i propozon ish-kryeministrit që palët të ulen sa më shpejt në tryezë dhe të gjejnë zgjidhjen më të mirë.
“Ne duhet t’i ofrojmë demokratëve alternativat më të mira qeverisëse. Jemi të gatshëm të ulemi dhe të bisedojmë me këdo për çfarëdo lloj diskutimi që është në të mirë të demokratëve. Nuk kemi as vija të kuqe as në llogore, por jemi për të zgjedhur zgjidhjet më të mira të mundshme për PD-në”, tha Sefa.
Sefa tha se vendimi i gjykatës së Apelit për vulën duhet të jetë një moment reflektimi për të gjitha palët në mënyrë që PD të bëhet një alternativë qeverisëse për shqiptarët përballë regjimit të Ramës.
“Do jetë një vendim i cili duhet trajtuar, në mënyrën më të përgjegjshme të mundshme, me maturi për t’i treguar demokratëve që shtëpia e tyre është e të gjithëve. Nuk mund të jetë e asnjë individi, por do të jetë e të gjithë demokratëve, është kontribut i të gjithë demokratëve që ajo parti është opozita e vërtetë dhe shpresa e shqiptarëve. Ky është një moment që të gjitha palët të reflektojnë dhe t’i japin mundësinë demokratëve të jenë alternativë qeverisëse. Askush nuk e ka monopolin e opozitës, askush nuk e ka monopolin e të vërtetës se akuzohemi s’i të shitur dhe të blerë, por kjo nuk është gjuha që demokratët duan”, u shpreh ai.
Discussion about this post