Kryetarja e Komisionit të Apelit në PD, Adriana Kalaja, në një intervistë për Rtv Ora e cilësoi vendimin e një dite më parë të Gjykatës së Apelit për vulën e PD në shkelje të ligjit dhe Kushtetutës.
“Është një vendim i paprecedentë në shkelje të plotë të ligjit dhe Kushtetutës.Duhet të mos harrohen emrat e këtyre tre gjyqtarëve, kanë dhënë një vendim të errët, anti-demokratik”, tha ajo.
Kalaja shkoi më tej kur, duke vënë në dukje pjesëmarrjen në sallën e gjyqit të përfaqësuesve të Ambasadës amerikane, akuzoi Yuri Kim për presion ndaj gjyqtarëve.
“Çfarë lidhje kanë përfaqësuesit e Ambasadës amerikane në një proces për një konflikt të brendshëm të PD. Yuri Kim është dukshëm në krah të mafies, regjimit, pushtetit të inkriminuar. Vetëm prezenca e përfaqësuesve të Ambasadës amerikane në sallë jo vetëm ishte një presion i dukshëm ndaj treshes së gjyqtarëve por konfirmuan në sy të publikut që kemi një reformë të dështuar, një sistem gjyqësor totalisht të kapur nga Edi Rama dhe kjo është bërë me mbështetjen e fuqishme të Ambasadës amerikane, dhe pagesat e fuqishme nga Fondacioni Soros. Për mua ka qenë një vendim i pritshëm por edhe për shumë demokratë të tjerë”, u shpreh.
Discussion about this post