Kyle Walker duket se ka kaluar në plan të dytë te bordi i Bayernit, aty ku sigurimi i Harry Kane është kthyer në temën kryesore të ditëve të fundit.
Edhe pse u aludua paraprakisht se takimi Bayern-Manchester City, i luajtur në Tokio do të finalizonte edhe kalimin e anësorit 33-vjeçar në Mynih, ende nuk ka informacione se çfarë po ndodh në prapavijë.
Megjithatë, portali “City Xtra” ka nxjerrë në dritë tentativën e drejtuesve anglezë, të cilët i kanë propozuar kontratë të re, por që kanë marrë përgjigjen e menjëhershme, “Jo faleminderit”.
Kjo panoramë bën të kuptosh se mbrojtësi i djathtë dëshiron vetëm bavarezët dhe nuk e ka ndërmend të zgjasë edhe një vit tjetër aventurën me kampionët e Anglisë.
“Daily Mail” raportoi para disa ditësh se Walker kishte arritur marrëveshje personale me kampionët e Gjermanisë dhe pengesa e fundit korrespondonte me akordin mes klubeve.
Ish-lojtari i Tottenham, ka kontratë me “qytetarët” deri në verën e vitit 2024 dhe mbulon krahun e djathtë, ndonëse mund të shtrihet deri në mesfushë, teksa vlera sipas “Transfermarkt” shkon në 13 milionë euro.
Discussion about this post