Pas refuzimit të ofertës së parë të Arsenal, prej 75 milionë paundësh për kapitenin e West Ham, Declan Rice, tashmë “The Hammers” kanë refuzuar dhe ofertën e 2-të të “The Gunners” teksa kërkojnë plot 100 milionë paund për anglo-irlandezin.
Sipas raportimeve më të fundit nga eksperti i merkatos, Fabrizio Romano, Kampionët e Conference League e konsiderojnë të vështirë arritjen e kushteve për pagimin e bonuseve të ofruara nga Arsenal dhe për këtë arsye kanë vendosur të ngrenë çmimin.
Mirëpo, nën-kampionët e Anglisë tashmë duhet të “nxitojnë”, pasi në bazë të raportimeve më të fundit nga tabloidet britanike, West Ham pret gjithashtu oferta nga Manchester City, me klubin Kampion të Europës që “nuk vuan nga lekët”.
Ndërkaq, kujtojmë se kontrata e Rice me West Ham është e vlefshme deri në vitin 2024. Përgjatë këtij sezoni që lamë pas “katalizatori” i mesfushës së “çekiçëve” zbriti në fushë plot 50 herë për skuadrën e West Ham, duke shënuar 5 gola e duke asistuar 4 të tjerë.
Discussion about this post