Ministrja për Evropën dhe Punët e Jashtme ka pritur sot në takim homologen e Suedisë Ann Linde, e cila është dhe drejtuese e radhës e OSBE.
Në një konferencë të përbashkët me Linde, Xhaçka tha se vizita e ministres vjen në kuadër të turit rajonal që po zhvillon në Ballkan, duke e cilësuar si tregues së vëmendjes që ka Suedia ndaj vendit tonë.
“Kjo vizitë, që vjen në fakt si pjesë e një turi rajonal të Ministres Linde, është një tregues i rëndësishëm i vëmendjes që Suedia dhe presidenca suedeze e OSBE-së tregojnë ndaj rajonit tonë. Kjo vëmendje është realisht e mirëpritur sepse siç e dimë të gjithë, rajoni ynë ndodhet në një moment që kërkon shumë vëmendje dhe shumë angazhim multilateral”, tha Xhaçka.
Njësoj si Rama, edhe Xhaçka nuk i kurseu kritikat ndaj BE, duke i bërë ata fajtorët që Shqipëria nuk ende një datë zyrtare për çeljen e negociatave.
“Ndodhemi në një moment ku vetë rajoni, pavarësisht vështirësive e momenteve delikate si ai i tensioneve në veriun e Kosovës, ka hedhur hapa shumë të mëdha përpara në rrugën e stabilizimit, zhvillimit e bashkëpunimit. Por ku siç e dimë të gjithë ka një paqartësi, që vjen nga BE, lidhur me hapat e mëtejshme të rajonit në procesin e integrimit europian. Dhe kjo paqartësi sigurisht, krahas dëmit që i bën reputacionit të BE, dëmton edhe paradigmën mbi të cilën është ngritur stabiliteti dhe bashkëpunimi në Ballkanin Perëndimor”, u shpreh ministrja.
Ministrja foli dhe për periudhën kur Shqipëria kryesonte prezencën e OSBE, teksa e konsideroi si një eksperiencë të vyer.
“Por, Shqipëria ka edhe një eksperiencë krejt të posaçme me OSBE, pasi kjo organizatë ka luajtur një rol vendimmarrës në zhvillimet demokratike në Shqipëri por edhe në përmirësimin e situatës së sigurisë në rajon, etj. Kjo eksperiencë ka qenë realisht e vyer gjatë kryesimit të OSBE nga vendi ynë dhe padyshim që jemi të gatshëm ta ndajmë atë me ekipin suedez të koleges Linde, pasi vendet tona ndajnë shumë qëndrime e prioritete të njëjta që mund të çohen përpara vetëm falë bashkëpunimit”, u shpreh ndër të tjera ministrja.
Në fjalën e saj, pas takimit me ministren Xhaçka, drejtuesja e OSBE tha se Suedia mbështet procesin e integrimit të Shqipërisë në BE.
“Suedia mbështet procesin e integrimit të Shqipërisë. Suedia mbështet reformat tuaja në rrugën drejt BE-së. Vendim i BE për të çelur negociatat për anëtarësimin e Shqipërisë është një gur kilometrik për marrëdhëniet tona. Ne u inkurajojmë që të vijoni reformat”, deklaroi Ann Linde.
Më tej, Linde theksoi se marrëdhëniet e Shqipërisë me këtë organizatë janë të shkëlqyera dhe do të thellohen më tej.
