Olta Xhaçka, ministrja e parë e jJashtme e Shqipërisë që adreson Këshillin e Sigurimit në OKB si vend anëtar, ka mbajtur në mbledhjen e ditës së sotme atje një fjalim të gjatë, i cili i referohej barazisë gjinore. Ajo theksoi se nuk mund të ketë paqe pa gratë, duke folur mbi temën “Gratë, Paqja dhe Siguria”. Më tutje ministrja e ka vënë theksin tek sfidat me të cilat gratë vijojnë të përballen edhe në ditët e sotme. Xhaçka thotë se gratë ende luftojnë për gjërat më thelbësore, siç është barazia.
“Dhe gjatë gjithë këtyre viteve një mendim më ka shoqëruar në mënyrë konstante: Si është e mundur që gratë duhet akoma të luftojnë për diçka kaq elementare si barazia, e për të njëjtat të drejta si burrat që janë gjysma tjetër e popullsisë? “, tha Xhaçka.
Më tutje, ministrja përmendi faktin se në shumë vende të botës gratë aktiviste përballen me kërcënime, deri tek rrëmbimet ose zhdukjet nga vetë autoritetet qeverisëse. Sipas saj edhe përse burrat janë shkaktarët kryesorë të luftërave, pasojat e saj i vuajnë gratë. Kjo gjë, tha Xhaçka ka ndodhur edhe në Kosovë gjatë luftës, ku gratë torturoheshin e përdhunoheshin.
Xhaçka ka vënë theksin tek prioriteti i qeverisë shqiptare sa i përket barazisë gjinore, duke theksuar se Shqipëria renditet tek 5 qeveritë e para me barazi gjinore të balancuar dhe 75% të posteve ministrore i mbajnë gratë. Ministrja tha edhe katër pikat që Shqipëria propozon për mbrojtjen e grave dhe përfaqësimin e tyre, duke përmendur si prioritare rritjen e fondeve për organizatat që mbështesin gratë dhe krijimin e organizmave financimi fleksibël, të afta për të vepruar shpejt dhe për t’u përgjigjur me shpejtësi kur gratë lidere përballen me kërcënime dhe akte ndëshkimore. Kujtojmë se, Më 11 qershor, Shqipëria u zgjodh si anëtare jo e përhershme në Këshillin e Sigurimit në OKB, për periudhën 2022-2023. Kjo është arritja më e madhe në diplomacinë ndërkombëtare për Shqipërinë.
Discussion about this post