Ministrja për Punët e Jashtme, Olta Xhaçka, ka hasur sërish çështjen e Kosovës sot në sesionin e 41-të të Konferencës së Përgjithshme të UNESCO. Gjatë fjalës së saj në konferencë, Xhaçka iu kërkoi të gjithë vendeve anëtare të organizatës, që të shikojnë më me seriozitet çështjen e anëtarësimit të Kosovës, mbështetur në parimin e gjithëpërfshirjes.
“Përfshirja e Kosovës, jo vetëm që do të ishte gjëja e duhur, por është një domosdoshmëri nëse më të vërtetë prioritet është adresimi i pretendimeve të përsëritura lidhur me ruajtjen e trashëgimisë kulturore dhe historike në Kosovë. Sepse e vërteta është që nuk ka mënyrë më të mirë dhe efikase për t’u marrë me ruajtjen e trashëgimisë kulturore, sesa përpjekjet e përbashkëta kombëtare dhe ndërkombëtare.
Prandaj unë sinqerisht shpresoj që arsyeja do të prevalojë dhe Kosova do të jetë e mirëpritur këtu, në mënyrë që qytetarët e saj, shqiptarët, serbët, dhe të tjerët, t’i bashkohen këtij komuniteti të madh dhe të punojnë së bashku me shtetet e tjera në promovimin e parimeve dhe vlerave që na bashkojnë të gjithëve”, u shpreh ministrja. Sipas Xhaçkës, përfshirja e Kosovës në UNESCO nuk ndihmon vetëm atë si shtet, por edhe vendet e tjera anëtare.
Discussion about this post