Komisioni i Ligjeve ka miratuar me shpejtësi dhe pa asnjë transparencë ligjin për legalizimin e kanabisit për qëllime mjekësore dhe industriale.
Pa verifikuar kuorumin e nevojshëm dhe në kulmin e debatit për çështjen Ahmetaj, anëtarët socialistë të Komisionit të Ligjeve janë mbledhur në një nga sallat e Parlamentit duke miratuar nxitimthi draftin e qeverisë për legalizimin e kanabisit.
Mësohet se dy prej deputetëve socialistë Pandeli Majko dhe Fatmir Xhafaj kanë abstenuar, ndërsa ligji në këtë komision është miratuar pa prezencën e opozitës.
Madje deputetët e opozitës nuk janë njoftuar nga administrata e Kuvendit apo kryetarja e Komisionit, Klotilda Bushka, lidhur me mbledhjen.
Mbledhja dhe miratimi i draftit është kryer në më pak se 15 minuta.
Ky miratim i draftit të qeverisë nga Komisioni i Ligjeve i hapën rrugën miratimit në seancën e sotme parlamentare të legalizimit të kanabisit për qëllime mjekësore dhe industriale, që nga opozita konsiderohet si një ligj në shërbim të grupeve kriminale.
“Ju merrni për 5 minuta vendimin për drogën. Po si keni arritur në këtë pikë?! E tha mirë Shalsi: ne vjedhim me lezet. Juve ju ka kap arroganca, nuk na llogarisni më”, tha deputeti demokrat Dashnor Sula në Parlament, i cili është dhe pjesë e komisionit të ligjeve.
Në një prononcim për mediat, deputeti tjetër demokrat te ligjet Saimir Korreshi, tha se nuk kishte një urdhër të kryetares së Kuvendit për zhvillimin e mbledhjes së komisionit në të njëjtën kohe me zhvillimin e seancës parlamentare. Kjo paligjshmëri sipas tij, bashkë me mungesën e kuorumit, e bën mbledhjen e ligjeve nul.
“U futën deputetët në një WC të Parlamentit, pa kamera, pa procesverbal dhe bënë mbledhjen e Komisionit. Për këto paska shpejtësi, për këtë tjetrën të Ahmetajt, duhet të presim 4-5 ditë. Rama duhet të kishte ardhur dhe të kërkonte falje para shqiptarëve se e kishte nxjerrë Ahmetajn si trurin e qeverisë së tij”, shtoi Korreshi.
Akuzën se mbledhja u zhvillua pa kuorum e përsëriti gjatë fjalës nga foltorja e Kuvendit dhe deputetja tjetër demokrate Ina Zhupa.
“Si kanabisit kaluat në 15 minuta ligjin e kanabisit fshehurazi, pa kuorum dhe vetëm për ti plotësuar dëshirën grupeve kriminale për të vazhduar të qetë të prodhojnë dhe transportojnë drogë në Shqipëri”, deklaroi Zhupa.
Discussion about this post