Sali Berisha dhe Lulzim Basha mund të konsiderohen si domosdoshmëri për Partinë Demokratike, por s’mund të jenë në krye të saj. Ky është mendimi i deputetit Ferdinand Xhaferaj, i cili në studion e emisionit “Tirana Live”, nga ku i kërkoi ish-Kryeministrit Berisha të bëjë një hap pas, ndërsa ish-kreut të PD-së, Lulzim Basha, i kujtoi se është në borxh me demokratët dhe duhet të japë kontributin si deputet.
“Ka një stanjacion sepse ajo që kemi parë e ajo që shohim deri tani është që kishim një rikthim të z.Berisha që sistemoi veten në krye të Rithemelimit, po nuk risistemoi opozitën shqiptare për të përmbysur qeverisjen.
Tani flitet për një rikthim të Bashës kur e kemi patur 8 vite dhe nuk ia doli dhe për cfarë duhet ky rikthim kujt i shërben.
Basha nuk ka lindur për të qenë vetëm kryetar partie, ajo është një dhuratë që ia bëri Berisha. Është ndër të paktën që erdhi në 2005 pa asnjë kontribut thjesht për shkak të një dashurie personale a familjare të z. Berisha. Tani të vijojë të japë kontribut se i ka shumë borxhe PD-së.
Dhe nuk është shqetësim sot as rikthimi i Sali Berishës e aq më shumë i Lulzim Bashës. Pse? Nëse do ia dilte Berisha të përmbyste qeverinë do i kërkonim falje por nuk ia doli. Këto kthimet për të sistemuar njërin apo tjetrin nuk vlejnë për asgjë”, u shpreh Xhaferaj.
Duke pohuar se Berisha ka vlera, Xhaferaj tha se çështja ku ndodhet PD nuk mund të shtrohet bazuar në preference personale, pasi ne duhet të fitojmë zgjedhjet.
“Mendoj se Berisha do reflektojë. Pavarësisht kthimeve dhe rikthimeve, ajo që duhet të prevalojë është axhenda e përgjithshme. Sot interesi i Berishës nuk integrohet me interesin e përbashkët, ndaj duhet të bëjë një hap pas”, tha ai.
Discussion about this post