Deputeti i Partisë Demokratike, Besart Xhaferri, foli mbi situatën politike në vend, duke e cilësuar Kuvendin një institucion të kapur dhe të degraduar, ku deputetët nuk janë më përfaqësues të qytetarëve, por “numra anonimë” në shërbim të një njeriu të vetëm Edi Ramës.
Xhaferri u shpreh se Shqipëria nuk është më një republikë parlamentare që prej vitit 2019, por një republikë e Kryeministrit, ku 140 deputetë janë kthyer në peng të një të çmenduri që ka vënë në rresht jo vetëm Parlamentin, por edhe 2 milionë qytetarë. Sipas tij, roli i deputetit është një mision, jo një nënshtrim, dhe opozita është sot e vetmja forcë që po i tregon Ramës fytyrën e vërtetë të një autokrati të zhveshur nga çdo normalitet.
Ai ngriti alarmin për degradimin e ndërgjegjes politike dhe institucionale, si dhe për nevojën urgjente të një marrëveshjeje të re me qytetarët dhe të një reforme zgjedhore që të mundësojë rotacionin real të pushtetit. Ai theksoi se pa një protestë të vazhdueshme dhe pa një presion të drejtpërdrejtë qytetar, ky regjim nuk ndalet
“Për mua nuk është kënaqësi të shkosh e të rrish në atë Kuvend. Nuk është nder të rrish krah deputetëve që nuk janë në politikë janë numra, janë anonimë. Siç kanë hyrë në atë Parlament, ashtu do të dalin, përveç se mund të bëhen meme.
Po ashtu, edhe te komisionerët shoh një degradim të ndërgjegjes qytetare të politikanëve. Po pati një degradim të ndërgjegjes së tyre, ai nuk është më një politikan, por është një skllav i Republikës së Kryeministrit.
Prej 2019-s, ne nuk jemi më një republikë parlamentare, por jemi një republikë e Kryeministrit, ku një i çmendur ka vënë në rresht 140 persona, dhe me ata 140, që janë barriera e fundit ndaj një të çmenduri, ka vënë në rresht edhe 2 milionë qytetarë, të cilët i ka çvarfëruar, përzënë, shkatërruar, bullizuar e të gjitha.
Deputeti është mision. Jemi në krye të një kauze që do ta ngremë dhe do ta fitojmë. Më besoni që Ramës, vështirësinë më të madhe, i vjen sot kur ka një opozitë që e nxjerr lakuriq, që është një autokrat.
Opozita do një marrëveshje më të mirë. Përmirësimi nuk duhet të ndalojë përmirësimi i diskursit, i kauzave dhe i një marrëveshjeje. Nëse do të bësh ndalesë për Ramën, duhet mbushur bulevardi, duhet protestë e vazhdueshme. Ky zullum ndalohet me forcën e qytetarëve dhe jo vetëm me forcë politike.
Rama është në degradimin e fundit dhe ai është futur në stadin e sëmundjes së tij të pushtetit. Ai nuk është më normal që në 2017-n. Unë kam qenë i qartë që pas 11 majit, që gjërat do të vijnë me ngritjen e dy faktorëve: me ngritjen e faktorëve të brendshëm marrëveshja me qytetarët dhe faktorëve të jashtëm, ndërkombëtarët, që duhet paralelisht të bashkohen në një pikë Ku ne të kemi strategjinë e duhur, fillimisht për të ndërtuar garën e barabartë në zgjedhje.
Se këtu, edhe sikur të bjerë kjo qeveri nga protesta afatgjatë, me këtë proces zgjedhor i vështirësohet rruga çdo rrotacioni të ri apo të vjetër politik për të rrëzuar PS-në.
Kur të vijë kjo pikë, PD do të jetë në kristalitetin e saj të mendimit për të kërkuar që koalicionet parazgjedhore të rikthehen në Kodin Zgjedhor. Duhet një reformë e re elektorale.
Plehrat janë biznesi i mafies. Nga projektligji, ata u rikthyen te riciklimi, që është më saktë ajo që PD e kishte nisur një industri ku u investuan 500 milionë euro. Ky e mbylli, i fali, i falimentoi. Sepse u zgjua një ditë dhe tha: “Unë do të bëj inovacion, dhe do të inceneroj”, dhe na inceneroi 500 milionë euro”, u shpreh ai.
Discussion about this post