Ilir Xhakolli, kryetar i Bashkisë Pogradec, është bërë bashkë më Luan Kaprin për të bërë fushatën parazgjedhore. Në këtë mënyrë mbushin dhe arkën e tyre me fondet e bashkisë. Në çdo javë Xhakolli po mbyll ndonjë projekt për të treguar se po investon në qytet, në fakt po mbush xhepat e Kaprit. Këtë herë, Luan Kapri ka marrë 250 milionë lekë për rregullimin e fasadave të disa pallateve në Pogradec. Bëhet fjalë për prokurimin me numër reference “REF-40883-09-07-2022” dhe objekt “Rehabilitim / Përforcim banesash ekzistuese kolektive 2022”. Ky tender është hapur në muajin shtator, por kontrata me fituesin është shpallur ditën e sotme. Edhe pse tenderi ka shkelje të ligjit për prokurimet, APP e ka regjistruar atë dhe nga sot fillon lëvrimi i fondit. Por, nga dokumentet e publikuara evidentohet se fituesi ka marrë tenderin pa garë, duke dëmtuar konkurrencën.
Gjithashtu, oferta e paraqitur ka qenë shumë e shtrenjtë, gati sa 95% e fondit limit. Ligji kërkon që në rastet kur ka mungesë konkurrentësh, tenderi duhet të anulohet. Dhe kur bëhet vlerësimi i ofertave duhet të merren parasysh ato më të lirat. Asnjë nga këto pika nuk është zbatuar, prandaj Open Data e ka klasifikuar në listën e tenderëve me “Red Flag”, që potencialisht është me risk për abuzime dhe korrupsion. Këto rregulla Xhakolli ka shkelur për mikun e tij Laun Kapri, pronar i “Rej shpk”.
1.3 miliardë lekë në një javë
Që kur është vendosur data e zgjedhjeve lokale, kryebashkiaku i Pogradecit është zgjuar nga gjumi letargjik dhe po mundohet të paktën të zbukurojë fasadat e qytetit. Tani, minimumi në çdo javë ai po zhvillon nga një tender. Fiks një javë më parë kompania “Rej” ka rrëmbyer një prokurim pa garë nga Bashkia Pogradec. Kontrata e tenderit është nënshkruar me datë 28 tetor dhe bëhet fjalë për prokurimin me objekt “Rikonstruksion dhe shtesë shkolla e mesme “14 Engjëjt” dhe 9- vjeçare “Servet Agolli”, Buçimas””, për të cilin është lënë në dispozicion vlera prej 116 850 640,00 lekë.
Kjo fitore është marrë pa garë, pasi edhe 3 kompani të tjera kanë paraqitur oferta, madje shumë më të lira se “Rej” shpk. Gjithsesi bashkia i ka skualifikuar me justifikimin se nuk kanë dorëzuar dokumentet origjinale, kur ligji përcakton se për të tilla raste Autoriteti Kontraktor duhet të vërë në dijeni për këto mungesa operatorët dhe t’iu japë mundësi për rikuperimin e tyre. Kështu 1.3 miliardë lekë i xhiroi në arkën e tij brenda një jave biznesmeni Luan Kapri. Ndërkaq, Gijotina.com ka listuar edhe raste të tjera abuzimi të Luan Kaprit me fonde të bashkisë Pogradec. Me sa duket ai ka më shumë pushtet se çdo drejtues që vjen në atë bashki.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post