Mark Nikaj, xhaxhai i Aleks Nikës që mbeti i vrarë në 21 janar tha në emisionin Review në Euronews Albania se i kanë humbur shpresat që do të bëhet drejtësi për tragjedinë që i mori jetën djalit të tyre.
Nika e cilësoi vrasje politike ekzekutimin e Aleksit dhe të tjetër në 21 janar.
“Prokuroria s’e ka kryer detyrën, vendi i ngjarjes është prishur nga gardistët, por shumë pak prova janë lënë. Ata kanë lënë gjurmë. Në rastin konkret prokuroria nën ndikimin e Sali Berishës e ka hetuar çështjen në mënyrë të përciptë. Babai i Aleksit e ka dëgjuar me veshët e tij si janë dhënë urdhrat nga Ndrea Prendi. Janë prova të pakontestueshme që vënë para përgjegjësisë jo vetëm drejtuesin e gardës, por edhe drejtuesit e tij, Berisha dhe Basha. Juristët janë ende nën ndikimin e Berishës. E kam të vështirë të besoj se SPAK mund të bëjë drejtësi. Nuk mundet asnjë jurist, asnjë gjykatës ta mbyllë çështjen siç kanë bërë deri tani si në rastin e plumbit të Aleksit. Është taktikë që çështja të zvarritet”, tha Nika.
Discussion about this post