Xhemal Loka është shpallur fajtor për vetëvrasjen e Bedrie Lokës. Gjykata e Durrësit ka dënuar me 10 vjet burg bashkëshortin e Bedrie Lokës. Raportohet se dhuna e vazhdueshme dhe të shoqit për disa video që qarkullonin në Tik Tok e shtynë 41 vjeçaren të vetëflijohej. Gjithashtu, Xhemal Loka akuzohet se ushtronte dhunë edhe ndaj fëmijëve, ndërsa ndaj tij ka nisur edhe një hetim i ri.
Si ndodhi ngjarja
Kujtojmë se Bedrie Loka, 41-vjeçarja që piu fostoksinë për t’u vetëflijuar, u gjet e shtrirë përtokë me shenja jete në tapetin e dhomës së ndenjës në shtëpi rreth orës 07:30 të mëngjesit të datës 2 janar nga bashkëshorti Xhemal Loka.
Sipas dëshmisë së tij në polici, me makinën e të vëllait e kanë dërguar fillimisht në urgjencën e Spitalin e Durrësit për ndihmë, aty ku e kanë lajmëruar se gruaja kishte pirë fostoksinë. Nga gjendja e rëndë ajo u nis për në QSUT dhe një ditë më vonë nuk mundi të mbijetojë për shkak të gjendje së rënduar shëndetësore.
Pasi hetuesit mbërritën në banesë, në vendin ku u gjet e shtrirë përdhe Bedrie Loka, u gjet një shishe plastike me ujë dhe disa kapsula me tub cilindrik, të cilat dyshohet se janë fostoksinë, një pjesë të konsumuara nga 41-vjeçarja.
Në tapetin e dhomës u konstatuan gjurmë ngjyrë gri nga materiali i fostoksinës. Kur dukej se gjithçka mund të ishte si pasojë e një denigrimi që po i bëhej figurës së saj në TikTok, blutë e Durrësit arrestuan bashkëshortin, Xhemal Loka, për të cilin fëmijët e 41-vjeçares i rrëfyen policisë se kishte tentuar ta vriste pasi ishte kthyer nga Greqia, vend ku punonte në mënyrë sezonale.
Qysh prej fillimit policia ngriti dyshime të forta se ishte vetë Loka i cili e çoi deri në vetëflijim bashkëshorten, nënë e 4 fëmijëve. I pyetur pas arrestimit ai kategorikisht nuk pranon të ketë lidhje më ngjarjen.
‘Nuk kam lidhje fare me vetëhelmimin e gruas sime. Ajo e ka bërë këtë për shkak të bulizimit në TikTok. Ka pasur stres dhe ankth të madh në kohët e fundit. Unë mendoj se këtë veprim mund ta ketë kryer për shkak se para rreth një viti persona të paidentifikuar i kanë hapur një adresë në TikTok në emrin e saj.’- tha ai asaj kohe.
Njoftimi i Gjykatës së Durrësit
Lidhur me kërkesën tuaj të datës 05.02.2025 për informacion lidhur me ngjarjen (shkaktim i vetëvrasjes së të ndjerës B.L), në kuadër të interesit publik, kërkoni informacion mbi çështjen në shqyrtim pranë kësaj Gjykatës së Shkallës së Parë të Juridiksionit të Përgjithshëm Durrës, nga verifikimet e kryera në Sistemin ICMIS rezulton se:
Pranë kësaj Gjykate është regjistruar çështja penale Nr. 835 Akti, me objekt: “Akuzuar per veprat penale”Shkaktim i vetevrasjes”, Mbajtja pa leje dhe prodhimi i armeve,armeve shperthyese dhe i municionit”dhe “Mbajtja pa leje dhe proidhimi i armeve ,armeve shperthyese dhe i municionit”,parashikuar nga nenet 99,278/4 dhe 278/3 te K.Penal ne ngarkim te pandehurit Xh. L.”
Gjyqtari i çështjes- Sh.Liçaj.
Në përfundim të gjykimit, Gjykata me Vendimin Nr. 7499, datë 19.12.2024, ka Vendosur:
1. Deklarimin fajtor të të pandehurit Xh.L për kryerjen e veprës penale “Shkaktimi i vetëvrasjes”, parashikuar nga neni 99 i Kodit Penal dhe dënimin e tij me 7 (shtatë) vite burgim.
2. Deklarimin fajtor të të pandehurit Xh. L.për kryerjen e veprës penale “Mbajtja pa leje dhe prodhimi i armëve, armëve shpërthyese dhe i municionit”, parashikuar nga neni 278 paragrafi i katërt i Kodit Penal dhe dënimin e tij me 3 (tre) vite burgim.
3. Në aplikim të nenit 55 të Kodit Penal, bashkimi i dënimeve në një të vetëm, duke e dënuar përfundimisht me 10 (dhjetë) vite burgim.
4. Vuajtia e dënimit të filloj nga data e arrestimit të tij dhe të kryhet në një burg të sigurisë së zakonshme.
5. Në zbatim të nenit 190 pika 1 gërma “ç” të Kodit të Procedurës Penale provat materiale, të sekuestruara t’i kthehen personit që i takojnë, pasi vendimi të marrë formë të prerë.
6. Në zbatim të nenit 190 pika 1 gërma “a” të Kodit të Procedurës Penale provat materiale, të sekuestruara me procesverbal-Një armë zjarri automatike PPS me nr.89-0579; të kaloj në favor të shtetit pasi vendimi të marrë formë të prerë.
7. Në zbatim të nenit 190 pika 1 gërma “ç” të Kodit të Procedurës Penale provat materiale, të sekuestruara me procesverbal vlerat monetare 2800 (dymijë e tetëqind) Euro dhe 27’000 (njëzet e shtatë mijë) lekë, t’i kthehen personit që i takojnë, pasi vendimi të marrë formë të prerë.
8. Shpenzimet procedurale gjatë hetimeve paraprake si dhe ato gjyqësore i ngarkohen të pandehurit.
9. Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm, brenda 15 (pesëmbëdhjetë) ditëve, duke filluar ky afat nga e nesërmja e njoftimit të vendimit të arsyetuar.
U shpall në Durrës, sot më datë 19.12.2024.
Gjykata e Shkallës së Parë e Juridiksionit të Përgjithshëm Durrës, shpreh gatishmërinë maksimale në kuadër të bashkëpunimit me Median, si dhe mbetemi të gatshëm për çdo sqarim apo eventualitet të mundshëm.
Discussion about this post