Aktori durrsak Xhevdet Ferri u nderua nga bashkia Durrës me titullin “Nderi i qytetit”, 4 vite pas vdekjes.
Ky vlerësim iu dha pikërisht në ditën kur Ferri ndërroi jetë nga një sëmundje e pashërueshme.
Ceremonia u mbajt në ambientet e teatrit “Aleksandër Moisiu”, ku aktori kishte performuar shumë role. Miq e kolegë ndanë disa kujtime me Xhodën, siç njihej në rrethin e ngushtë.
“Unë kam punuar shumë me të dhe jemi bashkuar në filmin “Mendimi”, “Hije që mbeten pas”, “Dasma e Sakos” dhe në fund tek filmi “Delegacioni”. Edhe deputet kemi qenë bashkë. Ishim bashkë sepse na puqnin shijet, natyra, diskutimet e përgjithshme për teatrin, filmin, lojën. Gjynah që iku pa mbushur 60 vjeç.”, tha aktori Ndriçim Xhepa.
“Janë shumë emocione për mua, nuk i mbaj dot. Na iku shpejt, humbje për teatrin. Me dridhen gjunjët, nuk flas dot më shumë”, tha Hysen Bashhysa.
“Ishte shumë bashkëpunues, krijonte marrëdhënie tepër miqësore dhe shoqërore”, u shpreh aktori Xhelal Tafaj.
“Xhevdet Feri është ndër bashkëkolegët më të mençur që ka kasta e artit shqiptar. Kishte inteligjencë emocionale dhe intelekt, i bekuar nga Zoti me një shpirt shumë të madh me atë që quhet “Artist””, tha Anila Varfi.
“S’para kam emocione, por sot e pata të vështirë. Jam njoh me Xhodën në vitin ’81. Që nga ajo ditë ne kemi qenë çuditërisht shumë të afërt”, u shpreh Petrit Beci.
Mes emocionesh dhe mallit, Bora Ferri e kujtoi të atin si një njeri mirënjohës e mjaft modest.
“Sa i bukur ke qenë mo babo. Si s’të ngjava pak më shumë. Ai iku shumë shpejt. Nëse do ishte më ne sot do kishte ndryshuar ngjyrë disa herë sepse ndesh me profesionin që kishte, nuk i pëlqente të ishte në qendër të vëmendjes. Në ka virtytet që e karakterizonin ishte mirënjohja dhe sot do kishte qenë shumë mirënjohës”, tha vajza e Xhevdet Ferrit.
Mirënjohje të përzemërta për atë që i dha artit shqiptar, shprehu edhe kryebashkiakja e Durrësit, Emiriana Sako.
“Atij i mjafton emri dhe vepra që ka lënë, por ne i japim dhe vlerësimin tonë modest, them modest, sepse Durrësi nuk i nxë përmasat e tij”, tha kryebashkiakja e Durrësit, Emiriana Sako
Xhevdet Feri u nda nga jeta 4 vite më parë, në moshën 59-vjeçare, ndërsa do të mbahet mend për shumë role të spikatura në kinematografinë shqiptare. Ky titull iu dha artistit të mirënjohur me motivacionin: “Personalitet i lartë dhe i shquar në fushën e artit, kulturës, edukimit, politikave kulturore, qytetar model, artist i madh i skenës dhe ekranit, deputet që përfaqësoi me nder dhe dinjitet qytetin e Durrësit”.
Xhevdet Feri, lindi në Durrës, më 26 nëntor 1960. Ai ishte bashkëshorti i aktores Rozeta Feri me të cilën ka luajtur në shumë filma si “Dhe vjen një ditë”, “Vitet e pritjes”, “Gjoleka djali i Abazit”, etj.
Filmi i tij i parë ka qenë kur ai ishte akoma një student. Më pas ai zhvilloi një karrierë të gjatë artistike.
Discussion about this post