Kukësi ka zgjedhur stadiumin ku do të presë Kastriotin për ndeshjen e javës së 20-të të Abissnet Superiore. Verilindorët ende nuk kanë marrë “OK”-in për të luajtur në stadiumin e tyre dhe këtë javë do të shtegtojnë në Rrogozhinë.
Kukësi do të luajë pikërisht aty ku mundi para pak ditësh Egnatian dhe do tentojë të bëjë të njëjtën gjë me krutanët e vendit të fundit.
Jashtë Kupës së Shqipërisë, tani rruga e vetme për të prekur Europën është kampionati dhe suksesi ndaj Egnatias tregoi se Kukësi di të reagojë edhe pas një goditje të rendë, për t’u rikthyer shumë shpejtë në shina. Në “Arena Egnatia”, verilindorët dominuan në çdo aspekt dhe u mjaftuan me dy gola, një në secilën pjesë, për të marrë tre pikë me shumë vlera.
Pas Kastriotit, Diego Longo dhe skuadra e tij do të nisin turin e forcës, pasi pikërisht në javën e 21-të, verilindorët do të udhëtojnë drejt Laçit, e më pas Teuta, Partizani dhe Vllaznia.
Discussion about this post