Ylli i Liverpoolit, Nabi Keita gjendet i bllokuar në vendlindjen e tij në Guinea për shkak të një grushti shteti.
Futbollisti kishte udhëtuar drejt vendlindjes për të luajtur kualifikueset e Botërorit dhe në sfidën e parë, duhej të përballej me Marokun. Por një grusht shteti ku ushtria ndërhyri dhe arrestoi presidentin e vendit, Alfa Konde, ka bërë që Guinea të jetë në prag të luftës civile.
Ushtria e Guineas që ka marrë kontrollin e vendit, lejoi që përfaqësuesja e Marokut të largohej me një leje speciale, por më pas bllokoi çdo fluturim në hyrje apo në dalje nga aeroportet e vendit. Kështu, Keita dhe shokët e tij që luajnë në klube në vende të ndryshme, kanë mbetur të bllokuar në këtë shtet.
Liverpooli ka qetësuar tifozët e saj duke komunikuar se Keita gëzon shëndet të plotë dhe po bëjnë të pamundurën për të shpëtuar futbollistin nga kaosi i krijuar.
