Ish-ministri i Drejtësisë Ylli Manjani, ka reaguar pas dorëheqjes së Luan Ramës nga të gjitha funksionet që mbante në LSI.
Manjani i ka dalë në krah Ramës, teksa shkruan në “Facebook” se ai nuk ka asnjë përgjegjësi për humbjen e mandatit në Vlorë, pasi ai vetë u shpall “tradhtar” para zgjedhjeve.
““Luan Rama, pavarësisht arsyeve që parashtron në dorëheqjen së Tij nga detyrat partiake, NUK KA ASNJË PËRGJEGJËSI politike për humbjen e mandatit të LSI në Vlorë. Në parim shqiptarët në zgjedhjet e fundit gjykuan LSI, jo kandidatët e saj. E çfarë gjykimi, pa!? Në Vlorë, ekuacioni u bë edhe më i vështirë kur 2 javë para ditës së votimit Luani u shpall “tradhtar”!!!! Se kë e çfarë tradhtoi Luani një dreq e di!? Them dreq se nuk dua të ngatërroj zotin me këto punë…Të shpallesh armik para votimit, të dilet në thirrje publike “mos votoni Luanin” dhe, të mendosh të marrësh dhe mandat këtë vetëm një politikë e çakërdisur e bën! Ndaj them se Luani nuk ka asnjë përgjegjësi”.
Manjani shton se LSI-ja vetë bënte thirrje që të votohej numri dy i listës, dhe jo numri një që ishte vetë Rama, duke e tradhtuar këtë të fundit dhe duke u bërë vetë përgjegjës që të humbnin mandatin.
“Ai nuk është vlonjat dhe nuk mori votat e shokëve të lagjes, që të jetë përgjegjës. Ai shkoi atje si përfaqësues politik dhe u shpall armik nga partia e tij, mu para votimit. LSI bënte thirrje të votohej nr. 2 i listës…Ja, kaq e thjeshtë është! Nga ana tjetër, Luani s’ka përse spjegohet gjatë për dorëheqjen e Tij, sepse ai nuk është i dorëhequr, por i tradhtuar! I tradhtuar, por edhe i dënuar për tradhti…,”- shkruan Manjani”.
Paraditen e sotme, Luan Rama, nënkryetari i LSI, njoftoi largimin nga partia dhe nga çdo funksion qëë mbante aty. Në një shkrim në rrjetet sociale, Rama sqaroi se drejtuesi i fushatës mban përgjegjësi edhe kur nuk është përgjegjës, referuar humbjes së LSI në Vlorë, ku nuk u arrit të merrej asnjë mandat.
