Ambasadorja amerikane në Shqipëri, Yuri Kim, së bashku me ambasadorin e BE-së, Luigi Soreca kanë zhvilluar një takim ditën e sotme me kreun e KQZ-së, Ilirjan Celibashin.
Në njoftimin e bërë nga Ambasada Amerikane, shkruhet se në qendër të takimit kanë qenë zgjedhjet e 25 prillit duke vënë theksin te raporti i ODIHR-it.
“Diskutuam mënyrat për të përmirësuar më tej zgjedhjet në Shqipëri. Duke vënë në dukje raportin përfundimtar të ODIHR-it, ambasadorët shprehën vlerësimin për administrimin kompetent të KQZ-së për zgjedhjet e 25 prillit. Por nënvizuan se tani është përgjegjësi e të gjitha institucioneve, autoriteteve dhe partive përkatëse të punojnë me KQZ-në për të adresuar rekomandimet në raportin përfundimtar të ODIHR-it”, shkruhet në njoftim.
Në raportin përfundimtar për zgjedhjet e 25 prillit, vëzhguesit ndërkombëtarë të OSBE-ODIHR kritikuan PS për abuzim me pushtetin në funksion të fushatës së tyre elektorale duke renditur një numër shkeljesh të standardeve demokratike nga ana e tyre, ndërsa bënë thirrje për hetime të shpejta dhe efikase për akuzat për blerje votash dhe për abuzime me burimet shtetërore. Raporti e konsideroi gjithashtu praktikën e Partisë Demokratike për krijim “grupesh për mbrojtjen e votës” si një lëvizje potencialisht ilegale.
Pas publikimit të raportit, kreu i opozitës Lulzim Basha komentoi duke e quajtur atë konfirmim të pretendimeve të tij për “masakër elektorale”. Ndryshe nga opozita, maxhoranca socialiste, e cila fitoi zgjedhjet, pretendoi përmes një deklarate të kreut të grupit parlamentar socialist Taulant Balla se “Shqipëria ka marrë raportin më të mirë për zgjedhjet në këto 30 vjet”.
