Kryeministri i Maqedonisë së Veriut Zoran Zaev, nuk dorëzohet derisa Bullgaria të heq veton dhe t’i hap rrugë për integrimin në BE. Zaev ka treguar sot se ka pasur një bisedë me kryeministrin e Bullgarisë Kirill Petkov dhe thelbi i bisedës ka qenë vazhdimi i punës për të gjetur një zgjidhje të pranueshme nga të dy palët, për fillimin e negociatave për anëtarësimin e Maqedonisë së Veriut.
“E përgëzova kolegun tim Kirill Petkov për zgjedhjen e tij si kryetar i Këshillit të Ministrave të Republikës së Bullgarisë. Në një bisedë telefonike me kryeministrin Petkov, i kam uruar mandat të suksesshëm dhe realizim të të gjitha prioriteteve të përcaktuara në programin e Qeverisë së tij, në dobi dhe prosperitet të shtetit bullgar dhe qytetarëve bullgarë”, ka shkruar Zaev në Facebook
Më tutje, Zaev tregon se kryeministri bullgar ka shprehur gatishmërinë për përshpejtimin e komunikimit dhe bashkëpunimit përmes disa grupeve, për të pasur një të ardhme të përbashkët në BE. “U dakorduam të vazhdojmë të punojmë për gjetjen e një zgjidhjeje të pranueshme për zhbllokimin e procedurës për fillimin e negociatave për anëtarësim të Maqedonisë së Veriut në BE dhe për një stimul të ri pozitiv për forcimin e marrëdhënieve bilaterale ndërmjet dy vendeve tona, në emër të një të ardhmeje të përbashkët evropiane”, ka shkruar Zaev. Kujtojmë se për shkak të vetos që Bullgaria i ka vendosur Maqedonisë së Veriut janë vonuat procedurat e integrimit edhe për vendin tonë, duke qenë se BE ka vendosur që negociatat për të dy vendet të bëhen në një rrugëtim.
Discussion about this post