Mbërritja te klubi turk Galatasaray e italianit Nikolo Zaniolo i garanton 3.5 milionë euro në sezon për katër vite. Lajmi u bë zyrtar e po ashtu bëhet e ditur se klauzola e largimit të tij do të jetë në vlerën e 35 milionë eurove, shifër që mund t’i lejojë lojtarit të largohet nga Stambolli që në verën e ardhshme.
Sidoqoftë, fantazisti ka menduar për këtë aspekt e duket se u ka kërkuar drejtueve të klubit turk lehtësira në rast se do të vijë një ofertë nga Milani.
Në faktë, kampionët e Italisë e tentuan blerjen në javën e fundit të janarit, por me Romën nuk u gjet një akord që t’i kënaqte të gjitha palët. Kuqezinjtë ishin gati t’u ofronin kryeqytetasve 22 milionë euro, teksa lojtari pranonte të mbante si rrogë 2.2 milionët vetëm për “Djallin”.
Sidoqoftë, pavarësisht formulës së transferimit, lojtari në verë mund të rikthehet. Për këtë janë të bindur shumë specialistë merkatoje të cilët risjellin në kujtesën e të gjithëve edhe bisedimet e pak javëve më parë kur fantazisti bëri gjithçka për t’u veshur kuqezi.
Sigurisht, shumë nga transferimi te Milani do të varet nga ecuria e 23- vjeçarit në kampionatin turk, por edhe ajo e kuqezinjve në Serinë A pasi pa një kualifikim në Champions vështirë se mund të bëhen sforco ekonomike, pavarësisht se Zaniolo mbetet një nga lojtarët më cilësorë të panoramës futbollistike italiane.
Discussion about this post