Sulmuesi i Torinos, Duvan Zapata ka humbur sezonin. Testet e kryera për kolumbianin, i cili u dëmtua në sfidën ndaj Interit ku shënoi edhe një gol, tregojnë një tronditje të rëndë për skuadrën Granata.
“Testet të cilave iu nënshtrua Duvan Zapata nxorën në pah një dëmtim të ligamentit të kryqëzuar anterior, meniskut medial dhe meniskut anësor”, thuhet në një postim të skuadrës nga Piemonte.
Dëmtimi pritet që ta mbajë Zapatën jashtë fushave për një kohë të gjatë, ndërsa Torino me mungesën e 33-vjeçarit humb një pikë referimi brenda dhe jashtë fushës.
Të dielën, sulmuesi falënderoi në rrjetet sociale ata që kishin menduar për të pasi u largua nga fusha e San Siro me barelë.
“Faleminderit të gjithëve për mesazhet dhe mbështetjen që më keni treguar në këto orë. Për të gjithë botën torineze dhe gjithashtu lojtarët, tifozët e Interit që më bënë të ndjej ngrohtësinë dhe afërsinë e tyre pas dëmtimit dje në San Siro”, shkruan sulmuesi.
Ndërkohë, Torino duket se do të hyjë menjëherë në merkato për të gjetur një zëvendësues për Zapatën në tregun e agjentëve të lirë dhe emri kryesor që po qarkullon është çuditërisht bomberi italian Mario Balotelli.
Discussion about this post