Policia e Durrësit ka finalizuar me sukses operacionin e koduar “Motoçiklisti”.
Në pranga ka rënë një 63-vjeçar nga Lezha, i arrestuar e akuzuar edhe më parë për vjedhje. Dyshohet se burri fshihet pas 9 vjedhjeve të ndodhura në qytetin e Durrësit.
Policia tregon se cilat janë datat që 63-vjeçari ka kryer vjedhje, kryesisht nëpërmjet mashtrimit.
Njoftimi i plotë:
Finalizohet operacioni i koduar “Motoçiklisti”.
Operacioni i zhvilluar nga Komisariati i Policisë Durrës, për goditjen e veprimtarisë kriminale në fushën e vjedhjeve.
Arrestohet në flagrancë një shtetas i dënuar disa herë më parë për vjedhje, i cili me anë të mashtrimit ka kryer disa vjedhje në qytetin e Durrësit.
Zbardhen dhe dokumentohen 9 vjedhje të ndodhura më parë, të cilat dyshohen se janë kryer nga ky shtetas.
Në vijim të punës për parandalimin e vjedhjeve, zbardhjen e vjedhjeve të ndodhura më parë, kapjen dhe vënien para përgjegjësisë ligjore të autorëve, shërbimet e Komisariatit të Policisë Durrës organizuan dhe finalizuan me sukses operacionin e koduar “Motoçiklisti”, si rezultat i të cilit, falë veprime të shpejta dhe të mirorganizuara, u arrestua në flagrancë shtetasi:
H. Gj., 63 vjeç, banues në Lezhë, i dënuar disa herë më parë për veprën penale “Vjedhja”.
Ky shtetas, më datë 20.07.2021, në orën 12:30, në lagjen nr. 5, Durrës, ka tentuar të vjedhë një shumë parash në dyqanin e shtetasit Ll. P. dhe më pas është larguar me motoçikletë, por është kapur në flagrancë në një distancë të shkurtër nga shërbimet e Policisë. Në cilësinë e provës materiale u sekuestrua shuma e parave të vjedhura dhe motoçikleta me të cilën u largua.
Nga hetimet e kryera rezultoi se ky shtetas, gjatë viteve 2020 dhe 2021, dyshohet se ka realizuar disa vjedhje të tjera në qytetin e Durrësit, duke përdorur të njëjtën motoçikletë, konkretisht:
Më datë 21.07.2020, në lagjen nr. 14, Shkozet, dyshohet se nëpërmjet mashtrimit i ka marrë një shumë parash shtetasit Sh. M.;
Më datë 12.02.2021 dyshohet se nëpërmjet mashtrimit i ka marrë shtetasit T. Rr., një shumë parash;
Më datë 05.03.2021 dyshohet se nëpërmjet mashtrimit i ka marrë një shumë parash shtetases F. L. dhe më pas është larguar me motoçikletë;
Më datë 24.03.2021 dyshohet se nëpërmjet mashtrimit i ka marrë shtetases A. B., një shumë parash;
Më datë 15.04.2021 dyshohet se nëpërmjet mashtrimit i ka marrë shtetasit B. B., disa materiale me vlerë 9.000 lekë, në dyqanin e tij;
Më datë 24.05.2021 dyshohet se nëpërmjet mashtrimit i ka marrë shtetases G. L., një shumë parash;
Më datë 24.05.2021 dyshohet se nëpërmjet mashtrimit i ka marrë shtetases S. B., një shumë parash;
Më datë 17.06.2021 dyshohet se nëpërmjet mashtrimit për një produkt i ka marrë shtetases E. R., një shumë parash.
Materialet i kaluan Prokurorisë së Rrethit Gjyqësor Durrës, për veprën penale “Vjedhja me anë të mashtrimit”.
