ATP ka njoftuar se ligji i ri për kompensimin e pronave është gati. Kujtojmë se një vit më parë, Gjykata Kushtetuese e rrëzoi skemën e kthimit dhe kompensimit të ish-pronarëve, parashikuar në ligjin e vitit 2015. Ndërkohë, në shtatorin e këtij viti ATP sëbashku me ministritë përkatëse nisën punën për hartimin e një drafti të ri ligjor dhe tashmë ky draft është drejtë finalizimit.
Lajmin për këtë e ka dhënë vetë Agjencia e Trajtimit të Pronave, e cila thekson se sa i përket pronarëve përfitues ata janë rreth 4 mijë. Po ashtu, bëhet me dije se vlera financiare shkon në shumën e 18 miliardë lekëve. “Duke kryer përllogaritjen e vendimeve që kanë njohur të drejtën e kompensimit, bazuar me vlerësimin financiar me 10 për qind të zërit kadastral aktual. Sipas përllogaritjeve rezulton që preken 4141 vendime dhe do të përfitojnë një vlerë financiare afërsisht 18 miliardë lekëve. Vendimet përfundimtare me vlerën e tyre përkatëse do të publikohen në Buletinin Zyrtar sapo të miratohen ndryshimet e propozuara në ligjin 133/2015. Nga hyrja në fuqi e ligjit 133/2015 deri në 31 dhjetor 2021, Agjencia e Trajtimit të Pronave ka ekzekutuar 794 vendime me një vlerë prej 7,842,824,600.14 lekë, nga të cilat 72 vendime janë mbyllje procedimi”, thuhet në raport. Ndër të tjera, në raport theksohet se gjatë periudhës janar – dhjetor 2021, janë regjistruar pranë sporteleve 107 aplikime të reja.
Discussion about this post