Vetëm një ditë pas vrasjes makabre që tronditi Greqinë ku burri ekzekutoi me 8 plumba në mes të tavernës gruan e tij, policia ka zbuluar detaje të reja nga ngjarja.
Sipas Protothemës, të dhëna të rëndësishme janë gjetur në celularin e 54-vjeçarit ku thuhet se autori ka regjistruar momentin e vrasjes. Sipas burimeve të tjera në dosjen audio, dëgjohen dialogje midis autorit dhe viktimës, si dhe të shtëna.
Pajisja e konfiskuar do të dërgohet për ekzaminim në laboratorët e Drejtorisë së Hetimeve Kriminologjike.
Krimi ndodhi në një tavernë në Larisa, në pronësi të vëllait të gruas, e cila ishte transferuar nga Athina dhe punonte aty që nga muaji Mars. 43-vjeçarja u qëllua për vdekje nga burri i saj 54-vjeçar me 8 plumba në pjesë të ndryshme të trupit.
Sipas informacioneve të para të siguruara nga ekzaminuesi mjekësor Rubini Leontari, viktima u gjet me një plagë plumbi mes vetullave, e cila vlerësohet të ketë qenë goditja fatale e saj.
