Të tjera detaje raportohen lidhur me krimin e ndodhur në një familje në Tiranë, ku një 40 vjeçare, me profesion mësuese, qëlloi me thikë motrën e saj.
Sherri që ka ndodhur mes Marsela Pushanit, 40 vjeç, dhe motrës së saj, Amanda, 37 vjeç, përfundoi me një viktimë, ndërkohë që dy motrat jetonin në një banesë në rrugën “Hajdar Hidri” në Tiranë, bashkë me nënën e tyre.
Viktima u qëllua me thikë në stomak, goditje që i ka shkaktuar vdekjen, edhe sipas autopsisë.
Urgjenca është njoftuar nga e ëma e dy motrave, ndërsa në banesën e tyre ka zbarkuar edhe policia, kur është njoftuar se 37-vjeçarja ka pasur një goditje me mjet të mprehtë.
E motra ka deklaruar se përgjatë ditës së djeshme së bashku me nënën e saj kanë debatuar me 37-vjeçaren, ndërsa shkak mendohet se ka qenë përdorimi i alkoolit nga viktima.
“Motra mori thikën dhe tentoi të më godasë mua dhe mamin. Në kushtet e vetëmbrojtës e qëllova me thikë në stomak aksidentalisht”, ka deklaruar Marsela Pushani.
Referuar raportimeve, viktima ishte e alkoolizuar dhe shkonte në supermarket të lagjes ku banonte, e kërkonte pije alkoolike, si edhe kishte konflikte me ta.
Nëna dhe motra e saj i kishin kërkuar këtyre dyqaneve që të mos i jepnin pije alkoolike 37-vjeçares. Duket se ky qëndrim ka agravuar debatet në familjen Pushani, duke çuar dy motrat drejt një konflikti të ashpër që shkaktoi edhe një viktimë.
Hetimi lidhur me ngjarjen vijon, ndërkohë që viktima ditën e hënë (4 shtator) do të festonte ditëlindjen e 37-të. Në hetim është përfshirë edhe nëna e dy vajzave, kjo për faktin se fillimisht është tentuar të mbulohet krimi, duke e deklaruar si një vdekje natyrale, më pas si një vetëvrasje, por nga policia janë hedhur dyshime për vrasje.
Discussion about this post