Partizani nuk ka kohë as për ta reflektuar për fitoren me Valmierën, pasi vetëm ditën e nesërme do të zhvillojë një ndeshje miqësore me Romën në “Air Albania” në orën 20:00. Të kuqtë kanë mbërritur në Tiranë në orët e para të ditës së sotme dhe po sot do të duhet të zbarkojnë menjëherë në stërvitje.
Këtë pasdite skuadra do t’i nënshtrohet një seance stërvitore në shërbim të miqësores së nesërme, por edhe për të ulur ngarkesat fizike te lojtarët, të marra në sfidën ndaj ekipit letonez.
Ndërkohë, Roma pritet të zbarkojë në kryeqytet mëngjesin e nesërm, ku do të vendoset në “MAK Albania” vetëm pak metra nga stadiumi “Air Albania”.
Skuadra italiane do të largohet nga vendi ynë menjëherë pas ndeshjes, rreth orës 23:00. Të nesërmen, verdhekuqtë e kanë sfidën e fundit miqësore përpara startit të Serisë A më 20 gusht me ndeshjen në “Olimpico” ndaj Salernitanës.
Ndryshe nga Partizani, që e ka thjesht një ndeshje për t’u shijuar, Roma vjen në këtë sfidë me objektivin për të kapur ritmin e ndeshjeve të kampionatit. Gjithsesi, kjo miqësore në brendësi të saj do të ketë edhe festë.
Këngëtari “Noizy” në rrjetet sociale ka konfirmuar performancën e tij në pushimin e ndeshjes, teksa mesa shprehet ai, në performancë do t’i bashkohet për pak çaste edhe trajneri i Romës, Jose Mourinho. Prej ditësh vijon shitja e biletave për këtë ndeshje.
Biletat në tribunën kryesore dhe atë VIP kushtojnë respektivisht 2500 dhe 5000 lekë. Ndërkohë, në tribunat pas portave çmimi është 400 lekë. Një biletë në tribunën përballë kushton 600 lekë. Biletat i gjeni në stadiumin “Selman Stërmasi” dhe “online”.
Prania e tifozëve në këtë përballje pritet të jetë mjaft e madhe, teksa të kuqtë shpresojnë për një stadium të mbushur plot, me qëllim për të siguruar sa më shumë të ardhura. Mba është mungesa e konfirmuar e Partizanit në sfidën e nesërme që do të transmetohet nga televizioni shtetëror shqiptar./PanoramaSport
Discussion about this post