Kancelarja gjermane, Angela Merkel mbërrin në vendin tonë më 13 dhe 14 shtator, ku do të zhvillojë një turne lamtumire në Ballkanin Perëndimor.
Sipas njoftimit zyrtar të Ambasadës së Gjermanisë në Tiranë, Merkel do të zhvillojë fillimisht një bisedë me kryeministrin Edi Rama dhe më pas me krerët e qeverive të gjashtë vendeve të Ballkanit Perëndimor në Tiranë.
Në fokus të takimit, janë biseda që lidhen me çështjet e politikës ekonomike dhe marrëdhëniet dypalëshe Shqipëri-Gjermani, por edhe çështje që lidhen me përafrimin me BE-në.
“Në bisedimet e më pasme me krerët e qeverive të gjashtë shteteve të Ballkanit Perëndimor, në plan të parë do të jenë çështjet e bashkëpunimit rajonal. Gjithashtu janë planifikuar bisedime dypalëshe me krerët e qeverive të Kosovës, Bosnje dhe Hercegovinës, Malit të Zi dhe Maqedonisë së Veriut”, shkruhet ndër të tjera në njoftimin e ambasadës.
Çfarë u vu re tek njoftimi i ambasadës, është se në një takim në nivel kryeministrash nuk do të jetë i pranishëm kryeministri serb, Alexandër Vucic. Më herët është bërë me dije, se Merkel pas vizitës në Tiranë, do të niset drejt Serbisë për të përmbyllur vizitën në Ballkanin Perëndimor.
