Vijojnë të zbardhen detaje dhe dëshmi lidhur me Klered Bozhanajn, 42-vjeçarin që mbrëmjen e së mërkurës plagosi me dy plumba një efektiv policie, por u arrestua 24 orë pas ngjarjes së rëndë.
E ndërsa më herët janë publikuar detaje se si ndodhi ngjarja, por edhe dëshmia e bashkëshortes së 42-vjeçarit, së fundmi është zbardhur edhe dëshmia e babait të Bozhanajt.
Ky i fundit pritet ti nënshtrohet një kontrolli mjekësor për të parë nëse vuan ose jo nga probleme të shëndetit mendor.
Dyshimet kanë lindur për shkak të dëshmive të tij konfuze para hetuesve, por edhe familjarëve të autorit që kanë thënë se Klered Bozhanaj vuan nga depresioni i theksuar.
Gazetarja e Klan Neës Glidona Daci ka siguruar edhe dëshminë që ka dhënë para grupit hetimor babai i Klered Bozhanaj.
V.Bozhanaj ka thënë se Kleredi së bashku me familjen e tij u kthyen nga Italia në Gusht të vitit 2022 dhe që prej asaj kohe kanë qëndruar te shtëpia e tij, në zonën e Kinostudios.
“Kleredi dhe bashkëshortja e tij kanë qenë të papunë dhe kanë jetuar me të ardhurat e prindërve të tyre”, thuhet në procesverbalin e grupit hetimor.
V.Bozhanaj ka deklaruar se Kleredi i kishte thënë që nga Italia ishte kthyer pas një konflikti me punëdhënësin, dhe sipas tij, policia italiane kishte mbajtur anën e punëdhënësit.
Për këtë arsye ishte detyruar të kthehej në Shqipëri dhe për këtë fakt, thotë babai, Kleredi fajësonte policinë italiane dhe për ta kishte krijuar urrejtje.
Sipas dëshmisë së babait, gjatë jetesës në banesë ai kishte vënë re se Kleredi ka qenë i paekuilibruar në biseda dhe i kishte kërkuar që të bënte një vizitë te mjekët psikiatër.
Por Klered Bozhanaj e kishte refuzuar vazhdimisht kërkesën e babait.
I ati i Klered Bozhanaj ka deklaruar para hetuesve se nga bisedat e zhvilluar ndërmjet tyre, kishte konstatuar se i biri kishte krijuar bindjen se nuk e donte askush dhe se të gjithë e urrenin.
Discussion about this post