Janë zbardhur detaje te reja nga dëshmia e parë e Elvis Shkëmbit, autori i dyshuar i vrasjes së gjyqtarit të Apelit, Astrit Kalaja, ngjarje e ndodhur më 6 tetor në ambientet e Gjykatës së Apelit në Tiranë dhe që tronditi opinionin publik.
Në deklaratën e dhënë para oficerëve të Policisë Gjyqësore, Elvis Shkëmbi ka rrëfyer se e kishte dëgjuar vetë vendimin e dhënë nga gjyqtari Kalaja dhe më pas ka vepruar nën ndikimin e momentit.
“Dëgjova vendimin e gjyqtarit. Armën e kisha me vete, e mbaja gjithmonë me vete dhe… ashtu e mendova për momentin. U ngrita dhe e qëllova. Më kapi një si mllef.” – ka deklaruar ai para hetuesve.
Dëshmia e Shkëmbit përforcon pistën e vetëgjyqësisë, që po hetohet nga autoritetet si motivi kryesor i atentatit.
Ndërkohë, xhaxhai i tij, Gjon Shkëmbi, i cili ndodhej në sallën e gjyqit në momentin e krimit dhe ishte palë në procesin gjyqësor, deri në këto momente nuk ka dhënë asnjë deklarim për grupin hetimor.
Hetuesit po e konsiderojnë edhe Gjon Shkëmbin si person që mund të ndihmojë në zbardhjen e rrethanave të plota të ngjarjes, por ende nuk dihet nëse ai ka refuzuar të flasë apo ndodhet në gjendje shoku pas krimit të rëndë.
Grupi hetimor ka sekuestruar pamjet filmike të sigurisë nga ambientet e Gjykatës së Apelit, ndërsa po analizohen edhe komunikimet e fundit të autorit, si dhe armët që ai kishte në dispozicion.
Ngjarja ka ngritur shqetësime të mëdha për sigurinë në ambientet gjyqësore, ndërsa institucionet ligjzbatuese dhe KLGJ kanë nisur rivlerësimin e protokolleve të sigurisë në të gjitha gjykatat e vendit.
Autoritetet pritet të japin më shumë informacion në ditët në vijim, ndërsa autori mbetet nën masën e sigurisë “arrest me burg” dhe pritet të merret sërish në pyetje.
Discussion about this post