Një javë pas vrasjes së efektivit Saimir Hoxha, ekspertët mjeko-ligjorë kanë zbardhur raportin përfundimtar për vdekjen e 21-vjeçarit Aldi Rama. Në raport thuhet se i riu vrau fillimisht efektivin Hoxha e pas disa orësh, në mënyrë aksidentale, vrau veten.
Nga ekspertiza që i është bërë trupit të 21-vjeçarit, bëhet me dije se vdekja ka ardhur si pasojë e një plage të shkaktuar nga arma e zjarrit, e cila ka sjellë shembjen e trurit e më pas përhapjen e hemorragjisë. Gjithashtu bëhet me dije se ka pasur dy vrima në kokën e Ramës, njëra hyrëse dhe tjetra dalëse, në formën e tubit.
Në plagën hyrëse, në kokën e tij vihet re një plagë e gjerë dhe rreth saj grimca baruti, faktor ky që konfirmon se 21-vjeçari ka qëlluar veten.
Arma e përdorur nga ana e të riut është e modelit TT, ku në të janë gjetur dhe gjurmët e gishtërinjve të tij.
